Şərur rayonunun Məmmədsabir kəndində bulaq-abidənin açılış mərasimi olub

Şərur rayonunun Məmmədsabir kəndində Birinci Qarabağ müharibəsi şəhidi Əhəd Seyidovun xatirəsini əbədiləşdirmək üçün inşa edilən bulaq-abidənin açılış mərasimi olub. Açılışdan əvvəl şəhidlərimizin əziz xatirəsi bir dəqiqəlik sükutla yad edilib. Azərbaycanın Dövlət Himni səsləndirilib. Şərur Rayon İcra Hakimiyyətinin başçısı Kamal Cəfərov çıxış edərək bildirib ki, əsası Ulu Öndər Heydər Əliyev tərəfindən qoyulan müzəffər Ordumuz Onun siyasi kursunun davamçısı cənab İlham Əliyevin komandanlığı ilə dövlət-xalq-ordu birliyi nəticəsində 44 gün ərzində işğaldakı torpaqlarımızı azad etdi. Bununla da ərazi bütövlüyümüz təmin olundu. Qeyd olunub ki, igid oğullarımız torpaqlarımızı işğaldan azad edərək 1990-cı illərdə Vətən üçün əliyalın döyüşən qəhrəmanların ruhunu şad etdi.

Qeyd olunub ki, I və II Qarabağ müharibələrində şərurlular da Azərbaycanın ərazi bütövlüyü uğrunda gedən döyüşlərdə fəal iştirak edib, qəhrəmancasına vuruşaraq I Qarabağ müharibəsində 72, II Qarabağ müharibəsində 31 olmaqla, 103 nəfər müqəddəs şəhidlik zirvəsinə ucalıb. Əhəd Seyidov da onlardan biridir. Onun Sədərək və Şahbulaq kəndləri uğrunda gedən döyüşlərdə göstərdiyi igidlik gənc nəslə nümunədir.

Tədbirdə şəhid anaları adından Vətən müharibəsi şəhidi Vüsal Vəliyevin anası Mədinə Vəliyeva, şəhid ataları adından şəhid Zülal Mədətlinin və Aqil İsmayılovun ataları çıxış edərək dövlətimizin şəhid ailələrinə göstərdiyi qayğıdan danışıb dövlət başçısına minnətdarlıqlarını bildiriblər.

Sonra çıxış edənlər şəhidin döyüş yolundan, igid oğullarımızın döyüşlərdə göstərdikləri qəhrəmanlıqdan bəhs ediblər. Şəhidin bacısı Qəndab Həsənova dövlətimizə minnətdarlığını bildirib

Sonda məktəblilər Vətənə və şəhidlərimizə həsr olunmuş şeirlər söyləyiblər. Xatirə şəkilləri çəkdirilib.

Ramiyə ƏKBƏROVA