Şəhid Rasim Məmmədovun anım günü ilə bağlı tədbir keçirilib

Naxçıvan Dövlət Texniki Kollecində Aprel döyüşləri zamanı Lələtəpədə şəhidlik zirvəsinə ucalan mayor Rasim Məmmədovun anım gününə həsr olunmuş tədbir keçirilib.

Əvvəlcə Azərbaycan Respublikasının ərazi bütövlüyü, suverenliyi uğrunda canından keçən şəhidlərimizin əziz xatirəsi bir dəqiqəlik sükutla yad edilib, Dövlət Himni səsləndirilib.

Tədbirdə çıxış edən Babək Rayon İcra Hakimiyyətinin başçısı Ovni Muradov Aprel döyüşlərinin tarixi əhəmiyyətindən bəhs edib. Aprel döyüşlərinin 44 günlük müharibədə qazanılan zəfərə aparan yol olduğunu vurğulayıb və Aprel döyüşlərindəki qələbədə Rasim Məmmədov, həmçinin onun kimi qəhrəman Vətən oğullarının misilsiz rolundan danışıb.

Tədbirdə Naxçıvan Muxtar Respublikası Ali Məclisinin deputatı Ülkər Bayramova və "Naxçıvan Muxtar Respublikası Televiziya və Radio Verilişləri" Qapalı Səhmdar Cəmiyyətinin sədri Sahil Tahirli də çıxış edib.

Tədbirin bədii hissəsində kollecin tələbə xor qrupu tərəfindən "Şəhidim" adlı mahnı ifa olunub. Ardınca isə Rasim Məmmədova həsr olunmuş şeirlər səsləndiriilib və videoçarx nümayiş olunub. Qeyd edək ki, tədbirdə iştirak edən şəhidimizin anası Bəsti Məmmədovaya və övladı Asim Məmmədova xatirə plaketi təqdim edilib.

Tədbirdə iştirak edən, "Vətən fədailəri" layihəsinin dəstəkçisi Şahin Məmmədov Naxçıvan Dövlət Texniki Kollecinin direktoru Asəf Ruşanova şəhid kitabları toplusunu təqdim edib və tədbirə yekun vurulub.
Sonda isə xatirə fotosu çəkdirilib.

Cavanşir Bağırlı