Sədərək Gömrük Postunda fövqəladə hallar zamanı davranış qaydaları üzrə məşq keçirilib

"Şərq qapısı" xəbər verir ki, Naxçıvan Muxtar Respublikası Fövqəladə Hallar Nazirliyinin təşkilatçılığı ilə Naxçıvan Baş Gömrük İdarəsinin Sədərək Gömrük Postunda “Mühüm əhəmiyyətli obyektlərdə fövqəladə hallara hazırlığın vəziyyəti diqqət mərkəzində saxlanılır, fövqəladə hallar zamanı davranış və yanğınsöndürmə işinin təşkili qaydaları” mövzusunda seminar-müşavirə və məşğələ keçirilib.
Seminar-müşavirədə Sədərək Gömrük Postunun rəisi gömrük xidməti polkovnik-leytenantı Kənan Heydərli tədbirin keçirilməsinin məqsədi və əhəmiyyətindən danışıb.
Fövqəladə Hallar Nazirliyinin şöbə rəisi Mirtaleh Seyidov mühüm əhəmiyyətli obyektlərdə fövqəladə hallara hazırlığın vəziyyəti, insanların həyat və sağlamlığı üçün təhlükə yarada biləcək fövqəladə hadisələrə qarşı tədbirlərin görülməsi və gömrük keçid məntəqələrində ehtimal olunan texnogen xarakterli fövqəladə hadisələr və onların qarşının alınması məqsədilə görüləcək tədbirlərdən bəhs edib.
Fövqəladə Hallar Nazirliyinin şöbə rəisi Oktay Həsənov və Sədərək rayon Dövlət Yanğından Mühafizə Hissəsinin rəis müavini Müşfiq Mustafayev mühüm əhəmiyyətli obyektlərdə yaradılan könüllü yanğın dəstələri və komandalarının fəaliyyəti, onların vəzifələri, eləcə də qarşılıqlı əlaqədə yanğınsöndürmə və xilasetmə işlərinin həyata keçirilməsində fəaliyyətin əlaqələndirilməsi, Fövqəladə Hallar Nazirliyinin 101 və 112 qaynar telefon xətləri ilə dayanıqlı rabitə əlaqəsinin yaradılması barədə məlumatlar veriblər.
Sonra Sədərək Gömrük Postunda texnogen xarakterli fövqəladə hadisələr zamanı xəsarət alanların xilas edilməsi, ilk tibbi yardımın göstərilməsi, ərazilərdə baş verən yanğınların söndürülməsində könüllü yanğın dəstələri və komandalarının Sədərək rayon Dövlət Yanğından Mühafizə Hissəsi ilə qarşılıqlı əlaqədə fəaliyyətinin əlaqələndirilməsi məqsədilə təlim keçirilib.
Uğurla başa çatan təlimdə qarşıya qoyulan məqsədlərə nail olunub.