NAXÇIVAN :

04 Aprel 2025, Cümə

Qəhrəman oğullarımızın sayəsində başımız ucadır

...

Aşur Bəybala oğlu Cəmiyev 

(18.06.1989-21.10.2020)

Xatirimdədir ki, orta məktəbdə oxuyanda Aşur yoldaşlarından seçilirdi. Məktəbə ilk qədəmlərini qoyanda onun bayraq sevgisinə hamı heyran idi. Partalarının üzərindəki bayrağı parta yoldaşı öz tərəfinə qoyubmuş. Evə gəlib inadkarlıq edirdi ki, mənim özümə də bayraq alacaqsınız. Parta üzərində mənim bayrağım olmalıdır. O qədər bu uşağın qəlbində bayraq sevgisi vardı ki... Mən işlə bağlı burada çox olmurdum. Əmisi söz vermişdi ki, Aşura bayraq alacaq. Və o da əmisinin aldığı bayrağı aparıb partasına qoymuşdu. 
Onun yüksək vətənpərvərlik hissləri bizi valeh edirdi. Böyüyəndən sonra hərbçi olmaq istəyini dilə gətirdi. Dedim, oradakılar aslandır. Dedi ki, ata, mən də o aslanlardan biri olacağam. Onun bu sözünün qarşısında mən gülümsədim. Çünki bir kəlməsi mənə fəxarət gətirdi. Sənədlərini də hazır etmişdi. Fürsəti dəyərləndirib həmin an dedi, ata, bu sənədə imza at. Açığı, bir az təkid edirdim getməməsi üçün. Dedi ki, yox, nəyin bahasına olur-olsun, mən hərbçi olacağam. Dedim, bir şərtim var ki, mənim alnım indiyə kimi necə açıq olubsa, yenə də alnıaçıq olacağamsa, imza atım. Birdən gedib fikrindən yayınacaqsansa, bu başdan olmaz. Dedi ki, ata, narahat olma, başını əbədi olaraq uca edəcəyəm. Dedim, söz verdinsə, razılaşdıq. Dediyi kimi də gedib verilən tapşırıqların öhdəsindən layiqincə gəldi. Getdim arxasınca, dedilər, narahat olmayın, 5-10 günə çağıracağıq. Dedikləri kimi də oldu. Bir neçə gündən sonra dəvət etdilər, getdik ki, Heydər Əliyev adına Milli Təhlükəsizlik Akademiyasına qəbul olub. Alnını qırışdırmadan Vətənə xidmət etdi. Döyüşlərə də öz istəyi ilə qatılıb. Baxmayaraq ki, ona 3 övladının olduğu deyilib. Qəti bildirib ki, Vətən məni çağırırsa, getməliyəm. 

Bu gün bizimlə görüşə gələn döyüş yoldaşları onun haqqında elə sözlər danışırlar ki, övladımla qürurlanmaya bilmirəm. Döyüşlərdə də arzusu daim yüksəkliklərə qalxmaq olub. İçimiz onun yoxluğu ilə sızıldasa da, təsəllimiz Aşurun adının əbədiyyən yüksəklərdə çəkilməsidir. Aşur, həqiqətən də, vətənpərvər oğul kimi özünü doğrultdu. 
Oğlumun timsalında şəhid və qazilərin sayəsində düşmən tapdağı altında qalan torpaqlarımız azad edildi. Allah Ali Baş Komandanımızı, ordumuzu qorusun. Xalqımız şəhidlərimizin adını uca tutaraq qürurla Zəfəri qeyd edirlər. Bu Zəfər şəhidlərimizin, igid oğullarımızın canı-qanı bahasına qazanılıb. Qəhrəman oğullarımızın sayəsində başımız ucadır. Allah şəhidlərimizin ruhunu şad eləsin. Qazilərimizin canı sağ olsun. Şəhidlərimizin qanına bələnmiş bayrağımız daim açıq səmalarda dalğalansın. Necə ki şəhidlərimizin başucalığı gətirən adları da ucalardadır!..

Nəşr edilib : 16.11.2024 21:01