NAXÇIVAN :

24 Aprel 2025, Cümə axşamı

"Peşəkar bələdçi" təlimi keçirilib

...

 3-4 mart tarixlərdə  Turizm işinin təşkili ixtisası üzrə təhsil alan tələbələrə “Peşəkar bələdçi” təlimi keçirilib.
"Şərq qapısı" xəbər verir ki, mart ayının 3-ü Naxçıvan Muxtar Respublikası Turizm Departamentində istehsalat təcrübəsi keçən Naxçıvan Dövlət Universitetinin Turizm işinin təşkili ixtisası üzrə təhsil alan tələbələrə “Peşəkar bələdçi” təliminin I modulu keçirilib.  

Təlimin giriş hissəsində Naxçıvan Muxtar Respublikası Turizm Departamentinin  Statistika və sertifikatlaşdırma sektorunun müdiri Süleyman Rüstəmov çıxış edib və ölkəmizdə turizm sahəsinə göstərilən diqqəti vurğulayıb. Bildirilib ki, ölkə başçısı cənab İlham Əliyevin imzaladığı sərəncamlar, qəbul edilən Dövlət proqramlarının uğurlu icrası Azərbaycanın turizm potensialının beynəlxalq aləmdə tanıdılması ilə yanaşı, turizmin müxtəlif növlərinin inkişafına da şərait yaradıb.       

Həmçinin sektor müdiri qeyd edib ki, ölkəmizdə turizm sahəsində əldə olunan uğurlar Naxçıvan Muxtar Respublikasından da yan keçməyib. Təlimdə “Qafqaz Turizm”     MMC-nin direktoru, tanınmış peşəkar turizm bələdçisi Mehman Şabanov "Bələdçi peşəsinin müasir tələbləri" mövzusunda geniş təqdimatla çıxış edib. Modulun əhəmiyyətini diqqətə çatdıran peşəkar bələdçi bildirib ki, bu modul tələbələri turizm sahəsindəki müasir dəyişikliklərə hazırlayır, onlara bələdçi və turist arasında effektiv əlaqə qurma bacarığı aşılayır.
Təlimin ikinci hissəsi praktiki məşğələlərə həsr olunub. Tələbələr “Xan Sarayı Dövlət Tarix-Memarlıq, Möminə Xatın və Açıq Səma Altında Muzey Kompleksi”ndə olub, Naxçıvanın məşhur turizm məkanlarında real bələdçilik xidmətləri təcrübəsi əldə ediblər.

Bu gün yəni 4 mart tarixdə isə "Peşəkar bələdçi“ təliminin II modulu keçirilib. Təlimin ikinci günündə Naxçıvan Muxtar Respublikası Turizm Departamentinin  Statistika və sertifikatlaşdırma sektorunun müdiri Süleyman Rüstəmov çıxış edərək turizm sektorunda bələdçi peşəsinin əhəmiyyətini diqqətə çatdırıb. Daha sonra "Naxçıvan Travel” MMC-nin rəhbəri, Dünya Turizm Bələdçilər Assosiasiyası Federasiyasının və Azərbaycan Turizm Bələdçilər Assosiasiyasının üzvü Natiq Paşayev “Turist psixologiyası və böhran vəziyyətində qrupun idarə edilməsi" mövzularında çıxış edib.

Təlimin praktiki məşğələ hissəsində tələbələr  Naxçıvan memarlıq məktəbinin incilərindən hesab edilən “Yusif Küseyr oğlu türbəsi”ni ziyarət edib, peşəkar turizm bələdçisindən real  mühitdə peşəkar davranış qaydaları, turistlərin marağını cəlb etmək və onlarla düzgün ünsiyyət qurmaq kimi vacib bacarıqları öyrəniblər.

Təlim uğurla başa çatıb .

Nəşr edilib : 04.03.2025 18:32