NAXÇIVAN :

19 Aprel 2025, Şənbə

Naxçıvanda özəlləşdirmədən daxil olan vəsait 39,5 faiz artıb

...

"Naxçıvan Muxtar Respublikasında cari ilin 11 ayı ərzində özəlləşdirmədən cəmi daxilolmalar ötən ilin eyni dövrü ilə müqayisədə 39,5 faiz artaraq 2,6 milyon manat təşkil edib, muxtar respublika büdcəsinə və xüsusi vəsait hesabına daxilolmalar isə 40 faiz artıb".
"Şərq qapısı" xəbər verir ki, bunu Naxçıvanda “Dövlət-Biznes dialoq platforması və gələcək perspektivlər” mövzusunda sahibkarlarla keçirilən görüşdə Naxçıvan Muxtar Respublikası iqtisadiyyat nazirinin müavini, nazir vəzifələrini müvəqqəti icra edən Abbas İsmayılov deyib.
O bildirib ki, cari ilin 11 ayı ərzində 140 hərrac və müsabiqə keçirilib. Hərrac və müsabiqələrin sayının 43 faiz azalmasına baxmayaraq xüsusi vəsait hesabına daxiolmalar 2 dəfə artıb: "Eyni zamanda, daşınmaz əmlakla bağlı xidmətlərin elektronlaşdırılması və vətəndaş məmnunluğunun yüksəldilməsi istiqamətində tədbirlər davam etdirilib. 2024-cü ilin 11 ayında dövlət xidməti üzrə vətəndaşlardan, sahibkarlıq fəaliyyətini həyata keçirən hüquqi və fiziki şəxslərdən daxil olmuş elektron müraciətlər ötən ilin müvafiq dövrü ilə müqayisədə 4,8 dəfə çoxdur".
Abbas İsmayılov qeyd edib ki, ilin 11 ayı ərzində dövlət əmlakının səmərəli idarə edilməsinin nəticəsində yeni bağlanmış icarə müqavilələrinin sayının 44 faiz azalmasına baxmayaraq icarədən büdcəyə daxilolmalar ötən ilin müvafiq dövrü ilə müqayisədə 55,4 faiz artıb: "2024-cü ilin 11 ayı ərzində 210 dövlət əmlakı özəlləşdirilib ki, bu da ötən ilin müvafiq dövrü ilə müqayisədə 75 faiz çoxdur. Həmçinin, cari ilin mart ayından dövlət əmlakının registrinin elektron sistem üzərindən aparılmasına başlanılıb. 406 dövlət müəssisə və təşkilatının balansında olan 4808 daşınmaz əmlaka dair məlumatlar Milli Avtomatlaşdırılmış Əmlak Sisteminə daxil edilib. 2024-cü ilin 11 ayı ərzində ötən ilin müvafiq dövrü ilə müqayisədə daşınmaz əmlakın dövlət qeydiyyatı 3,8 faiz, hazırlanmış texniki sənədlərin sayı isə 4,2 faiz artıb. Cari ilin 11 ayı ərzində daşınmaz əmlakın qeydiyyatı, texniki inventarlaşdırılması və kadastr xidmətlərindən daxilolmalar 14,6 faiz, dövlət rüsumu isə 12,4 faiz artıb".

Nəşr edilib : 06.12.2024 11:55