Naxçıvanda “İlahi zəriflik” adlı sərgi açılıb

Naxçıvan Muxtar Respublikası Rəssamlar Birliyinin ərazisində açıq səma altında 8 Mart – Beynəlxalq Qadınlar Gününə həsr olunmuş “İlahi zəriflik” adlı sərgi açılıb.

Sərginin açılışına başlamazdan əvvəl Ulu Öndər Heydər Əliyevin və ölkəmizin suverenliyi uğrunda canlarını qurban vermiş şəhidlərimizin əziz xatirəsi bir dəqiqəlik sükutla yad edilib.

Tədbiri giriş sözü ilə Naxçıvan Rəssamlar Birliyinin sədri, Milli Məclisin deputatı Ülviyyə Həmzəyeva açaraq bildirib ki, bu gün burada yalnız Azərbaycan qadınının gücünü, fədakarlığını və müdrikliyini qeyd etməklə yanaşı, həm də onun ruhunun zərifliyini, qəlbinin dərinliyində gizlənən ilahi gözəlliyi tərənnüm edirik. “İlahi zəriflik” adlı sərgimiz də məhz bu ali məqamı özündə ehtiva edir. Belə ki, bu cür sərgilər Azərbaycan qadınının təkcə bir qəhrəmanlığını deyil, incəlik və nəciblik simvolu olduğunu da dünyaya nümayiş etdirir.

Qeyd olunub ki, Azərbaycan qadını xalqın taleyində mühüm rol oynayıb. Tomris, Nüşabə, Mömünə xatın, Sara xatın kimi igid və müdrik qadınlarımız dövlət idarəçiliyində parlaq iz qoyaraq xalqımızın şərəf və qürur rəmzinə çevriliblər. Bu gün də qadınlarımız o sarsılmaz iradəni və ailə dəyərlərini özündə yaşadır. O təkcə ailəsinin dayağı, övladlarının ilk müəllimi deyil, eləcə də elmin, mədəniyyətin, siyasətin, iqtisadiyyatın öncüllərindən biridir.

Vurğulanıb ki, Azərbaycan Respublikasının Birinci vitse-prezidenti Mehriban xanım Əliyeva bu gün hər bir Azərbaycan qadını üçün nümunədir. Onun çoxşaxəli, yorulmaz fəaliyyəti dövlətçiliyimizə, milli-mənəvi dəyərlərimizin qorunmasına, təhsil, səhiyyə, mədəniyyətimizin inkişafına misilsiz töhfələr verir. Mehriban xanım Əliyevanın humanitar missiyası dünyada Azərbaycan qadınının yüksək intellektual və mənəvi dəyərlərin təcəssümü kimi qəbul olunur. Onun rəhbərliyi ilə həyata keçirilən genişmiqyaslı layihələr, xeyriyyəçilik təşəbbüsləri qadınlarımızın mərhəmət, sevgi və zəriflik simvolu olduğunu bir daha sübut edir.

Çıxışının yekununda Ülviyyə Həmzəyeva bayram münasibətilə qadınları təbrik edərək onlara xoş arzularını bildirib.

Daha sonra sərginin qonaqlarından Naxçıvan Musiqi Kollecinin direktoru Məhəbbət Babayeva, Naxçıvan Müəllimlər İnstitutunun müəllimi, sənətşünas Nizami Aliyev, rəssam Qəhrəman Tağıyev, Bəhruz Kəngərli Muzeyinin direktoru Səbinə Əlincəli çıxış edərək Azərbaycan qadınının gücü, qəhrəmanlığı və zərifliyindən söz açıb, onlara xoş arzu və təbriklərini bildiriblər.

Qeyd edək ki, 2 gün davam edəcək sərgidə 23 rəssamın 70-ə yaxın rəsm və dekorativ-tətbiqi sənət əsərləri nümayiş olunur.

Aidə İBRAHİMOVA