NAXÇIVAN :

05 Aprel 2025, Şənbə

Naxçıvanda Aqrar Subsidiya Şurasının yeni qərarı ilə bağlı sessiyalar keçirilir

...

Azərbaycan Respublikası Aqrar Subsidiya Şurası tərəfindən qəbul edilən yeni qərarla bağlı istehsalçıların məlumatlandırılması məqsədilə muxtar respublikanın bütün bölgələrində maarifləndirici sessiyalara başlanılıb.
Naxçıvan Muxtar Respublikası Kənd Təsərrüfatı Nazirliyinin mətbuat xidmətindən “Şərq qapısı”na bildirilib ki, ilk sessiya Kəngərli rayonunda keçirilib.
Tədbirdə Naxçıvan Muxtar Respublikası kənd təsərrüfatı nazirinin müavini, nazir vəzifələrini icra edən Xəyalə Dadaşova bildirib ki, muxtar respublikada aqrar sahə üzrə subsidiyalar ölkə Prezidentinin 2019-cu il 27 iyun tarixli Fərmanı ilə təsdiq edilmiş “Kənd təsərrüfatı məhsulları istehsalının subsidiyalaşdırılması Qaydası”nın 2.4-cü bəndinə müvafiq olaraq Aqrar Subsidiya Şurasının müəyyən etdiyi əmsallara uyğun olaraq ödəniləcək. Fərmanın tələblərinə görə subsidiyaların verilməsi elektron kənd təsərrüfatı informasiya sistemi vasitəsilə tənzimlənir. İndiyədək elektron sistemin mövcud olmaması səbəbindən muxtar respublikada Fərmanın tələblərinin həyata keçirilməsi mümkün olmayıb. Bu məqsədlə  keçid dövrü ilə əlaqədar 2023-cü ildə Ali Məclisin müvafiq Fərmanı ilə müvəqqəti subsidiya qaydası təsdiq olunub. Bununla yanaşı, struktur islahatları hazırlanıb, hazırda isə elektron kənd təsərrüfatı  informasiya sisteminə keçid işləri həyata keçirilir.
Naxçıvan Muxtar Respublikasında aqrar sahə üzrə veriləcək subsidiya əmsalları ilə bağlı yeni qərarlar qəbul edildiyini qeyd edən nazir müavini deyib ki, yerləşdiyi ərazi, strateji əhəmiyyəti, kənd təsərrüfatı istehsalçılarının mövcud vəziyyəti nəzərə alınaraq muxtar respublikada subsidiyaların verilməsində fərqli yanaşmanın tətbiqi ilə bağlı müvafiq təkliflər verilib. Məsələ Azərbaycan Respublikasının Kənd Təsərrüfatı Nazirliyi ilə müzakirə olunub və müsbət nəticə əldə edilib. Belə ki, yeni qəbul olunmuş qərara əsasən  respublikanın digər bölgələrində 1 hektar alma bağına 11 min manat subsidiya hesablanırsa, qeyd olunan məbləğ muxtar respublikada 32 min 200 manat təşkil edir. Eyni zamanda 1 hektar armud bağına  respublikanın digər bölgələrində 8 min manat subsidiya hesablanırsa, bu məbləğ muxtar respublikada 25 min 200 manatdır.
Naxçıvan Muxtar Respublikası Kənd Təsərrüfatı Nazirliyinin şöbə müdiri Tural Haqverdiyev müvafiq qərara əsasən ödəniləcək subsidiya məbləğləri barədə ətraflı məlumat verib. Qeyd olunub ki, 2024-cü il sentyabrın 1-dən 2025-ci il mayın 31-dək salınan, üzüm bağları üçün məbləğ 8 min manatdan 14 min 700 manata, fındıq bağları üçün 4 min 400 manatdan 8 min 50 manata, şaftalı, nektarin və ərik bağları üçün 4 min manatdan 24 min 500 manata, püstə bağları üçün 4 min 500 manatdan 6 min 300 manata, badam bağları üçün 3 min 500 manatdan 7 min 350 manata, qoz bağları üçün isə 3 min 300 manatdan 5 min 600 manata artırılıb. Həmçinin qərarda tarlaqoruyucu zolaqlar üçün istifadə edilən bitkilərin 1 hektarına 1000 manat məbləğində subsidiyanın verilməsi də yer alıb.
Diqqətə çatdırılıb ki, yeni qəbul olunmuş qərarda fərqli tələblər də mövcuddur. İstehsalçılar çalışmalıdırlar ki, yeni bağ salarkən ərazinin dəniz səviyyəsindən müvafiq hündürlükdə yerləşməsini, torpağın elektrik keçiriciliyinə dair tələblər, əkiləcək tinglərin sayını və sertifikatlı olmasını, o cümlədən müasir suvarma sistemlərinin tətbiqini diqqətdə saxlasınlar. Nəticə etibarilə, tələblərə riayət edən əkinçilər daha yüksək məbləğdə subsidiya alacaqlar. 
Sonra mövzu ətrafında fikir mübadiləsi aparılıb, istehsalçıların sualları cavablandırlıb.
Qeyd edək ki, Kəngərli ilə yanaşı, Şərur və Sədərək rayonlarında da analoji tədbirlər keçirilib və sessiyalar muxtar respublikanın digər bölgələrini də əhatə edəcək.

Nəşr edilib : 19.02.2025 15:05