Naxçıvanda 8 Mart – Beynəlxalq Qadınlar Günü qeyd edilib

Martın 7-də Naxçıvan Muxtar Respublikası Ailə, Qadın və Uşaq Problemləri üzrə Dövlət Komitəsinin, Naxçıvan Muxtar Respublikası Mədəniyyət Nazirliyinin, Naxçıvan Şəhər İcra Hakimiyyətinin və Naxçıvan Muxtar Respublikası Həmkarlar İttifaqları Şurasının birgə təşkilatçılığı ilə C. Məmmədquluzadə adına Naxçıvan Dövlət Milli Dram Teatrında “Konstitusiya və Suverenlik İli” ilə əlaqədar “Qadın hüquqlarının təsbiti və təminatı” mövzusunda tədbir keçirilib.

Əvvəlcə Ümummilli Lider Heydər Əliyevin və şəhidlərimizin əziz xatirəsi bir dəqiqəlik sükutla yad edilib, Azərbaycan Respublikasının Dövlət Himni səsləndirilib.

Naxçıvan Muxtar Respublikası Ailə, Qadın və Uşaq Problemləri üzrə Dövlət Komitəsinin sədri Ramilə Seyidova çıxışında qeyd etmişdir ki, Azərbaycan qadınları tarixboyu elm, mədəniyyət, siyasət və hərbi sahələrdə əhəmiyyətli uğurlar qazanmışlar. XX əsrin əvvəllərində Şərqdə ilk dəfə olaraq qadınlara seçki hüququnun verilməsi Azərbaycan qadınının siyasi arenaya çıxışının ilk mühüm mərhələsi oldu. Ümumilikdə, ölkəmizdə qadınların inkişafına xüsusi diqqət yetirilmiş, onların ictimai-siyasi və iqtisadi həyatda aktiv iştirakı təmin olunmuşdur.

Ulu Öndər Heydər Əliyevin ideyaları bu gün də xalqımız üçün bir mayak olmaqla inkişaf və tərəqqi yolumuzu müəyyənləşdirir. Onun siyasi kursunun layiqli davamçısı kimi Prezident İlham Əliyevin atdığı addımlar hər bir azərbaycanlıda qürur və fərəh hissi yaradır.

Naxçıvan qadınları tarixboyu milli mədəniyyətimizin və adət-ənənələrimizin qoruyucusu olmuşdur. Qədim Naxçıvan torpağında qadınlarımız elmin, maarifçiliyin və ictimai həyatın müxtəlif sahələrində öz dəst-xətini qoymuşlar. Bu gün onlar dövlət quruculuğu, hüquq-mühafizə, elm, səhiyyə, təhsil, mədəniyyət, idman, kənd təsərüffatı və digər sahələrdə fəaliyyət göstərirlər.

Komitə sədri Ramilə Seyidova 8 Mart - Beynəlxalq Qadınlar Günü münasibətilə bütün xanımları təbrik edərək, onlara sağlam və firavan həyat arzulamışdır.

Sonra Naxçıvan Şəhər İcra Hakimiyyəti başçısının birinci müavini Əhməd Vəliyev, Naxçıvan Muxtar Respublikası Həmkarlar İttifaqları Şurasının sədr müavini Xatirə İbrahimli, Naxçıvan Muxtar Respublikası Ali Məclisinin deputatı Rza Xudiyev, Naxçıvan Muxtar Respublikası kənd təsərrüfatı nazirinin müavini Xəyalə Dadaşova, Naxçıvan Dövlət Universitetinin tələbəsi, Heydər Əliyev təqaüdçüsü Fidan Hüseynova çıxış edərək Azərbaycan qadınlarının ictimai-siyasi fəallığı, Vətənə sədaqəti, ailəyə bağlılığı və fədakarlığı sayəsində həm Şərq, həm də Qərb dünyası üçün unikal inkişaf yolu seçdiklərini bildirmiş və bayram münasibətilə xanımları təbrik ediblər.

Tədbirin davamında muxtar respublikanın ictimai-siyasi həyatında fəal iştirak edən 20 qadına müxtəlif nominasiyalar üzrə Naxçıvan Muxtar Respublikasının Ailə, Qadın və Uşaq Problemləri üzrə Dövlət Komitəsi tərəfindən diplomlar təqdim edilib.

Tədbir bədii hissə ilə davam edib.