NAXÇIVAN :

04 Aprel 2025, Cümə

Naxçıvan Sağlamlıq Mərkəzinə 33 adda yeni tibbi və texniki avadanlıqlar alınıb

...

“Naxçıvan Muxtar Respublikasının sosial-iqtisadi inkişafına dair 2023-2027-ci illər üçün Dövlət Proqramı”nın 2025-2027-ci illər üzrə Təfsilatlı Tədbirlər Planı”nına uyğun olaraq muxtar respublikada tibb xidmətlərinin keyfiyyətinin yaxşılaşdırılması üçün bir sıra işlər həyata keçirilir. Belə ki, Təfsilatlı Tədbirlər Planının İnstitusional inkişaf prioritet istiqamətində Tibb müəssisələrində xidmətlərin keyfiyyət səviyyəsinin yüksəlməsi qeyd olunub ki, bu istiqamətdə Naxçıvan Sağlamlıq Mərkəzinə 33 adda yeni tibbi və texniki avadanlıqlar alınaraq əhalinin istifadəsinə verilmiş və xəstələrin daha komfortlu və effektiv müalicə alması üçün mərkəzdə genişmiqyaslı infrastruktur yenilənməsi aparılıb".

“Şərq qapısı” xəbər verir ki, bu sözləri jurnalistlərə açıqlamasında Naxçıvan Muxtar Respublikası Nazirlər Kabinetinin Humanitar məsələlər şöbəsinin müdir müavini Hüseyn Ələsgərov deyib.

Nazirlər Kabinetinin rəsmisi qeyd edib ki, həmçinin Ailə Sağlamlıq, Onkoloji və Hemodializ Mərkəzləri üçün də bir sıra avadanlıqlar alınıb və mərkəzlərdə təmir işləri başa çatdıqdan sonra avadanlıqlar istifadəyə  veriləcək. Mərkəzlərdə həyata keçirilən bu islahatlar, Təfsilatlı Tədbirlər Planının İnstitusional inkişaf prioritet istiqamətinə uyğun aparılır və tibbi xidmətlərinin keyfiyyətini artırmaq, həmçinin xəstələrə yüksək səviyyədə sağlamlıq xidmətləri təqdim etmək məqsədini daşıyır. Bu yeniliklər Naxçıvan əhalisinin sağlamlığına öz töhfəsini verməklə yanaşı, tibbi xidmətə əlçatanlığı daha da yaxşılaşdırılacaq. Adıçəkilən avadanlıqların alınması, mərkəzin tibbi infrastrukturunun gücləndirilməsinə və müalicə proseslərinin daha effektiv, rahat və təhlükəsiz şəkildə həyata keçirilməsinə imkan yaradacaq.

“Bundan başqa, Naxçıvan Sağlamlıq Mərkəzində müasir tələblərə uyğun laboratoriya qurulub və bu laboratoriya üçün müvafiq avadanlıqlar alınıb. Qısa müddət ərzində bu avadanlıqların istifadəyə verilməsi nəzərdə tutulur. Mərkəzdə əlavə olaraq, iki yeni müasir avadanlıqlarla təchiz edilmiş əməliyyat otaqları istifadəyə verilib. Bu otaqlardan biri hibrid əməliyyat otağıdır ki, bu otaqda yüksək dəqiqlikli diaqnostik və cərrahi müdaxilələrin eyni vaxtda aparılması mümkündür. Məlumat üçün qeyd edək ki, Naxçıvanın Sağlamlıq Mərkəzində yaradılmaqda olan laboratoriyada İcbari Tibbi Siğortanın Xidmətlər Zərfinə daxil olan bütün laborator xidmətlər göstəriləcək. Bütün bu yeniliklər, Naxçıvan əhalisinin sağlamlığına öz töhfəsini verməklə yanaşı,  tibbi xidmətə əlçatanlığı daha da yaxşılaşdıracaq”, – deyə Hüseyn Ələsgərov əlavə edib.

Nail ƏSGƏROV

Nəşr edilib : 04.03.2025 12:09