NAXÇIVAN :

04 Aprel 2025, Cümə

Ən müqəddəs və ən uca zirvə

...

Sədi Süleyman oğlu Musayev

(01.04.1978-28.09.2020)

Sədigil evdə 5 uşaq olub. Sədi həmişə məhəllədəki uşaqları yığıb başına tüfəng-tüfəng oynayardılar. Bir gün iki taxta parçası gətirdi. Atasına dedi ki, mənə tapança düzəlt. O vaxtlar mağazalarda elə tapança kimi oyuncaqlar yox idi, ya da az tapılardı. Atasının da yaxşı əl qabiliyyəti vardı. O taxta parçalarından oyuncaq tapança düzəldib Sədiyə verdi. Tez qaçıb qardaşları, məhəllə uşaqları ilə oynamağa başladı. 7-ci sinifdə oxuyarkən özü atasına dedi ki, mən hərbiyə getmək istəyirəm. Atası bildirdi ki, sənin hələ boyun balacadır. İnadla dedi, yox, mən hərbiyə getmək istəyirəm. İstədiyi kimi hərbiyə getdi və qismət də gətirdi Cəmşid Naxçıvanski adına Hərbi Liseyə qəbul oldu. Orada oxuyarkən evə təşəkkürnamələr göndərilirdi. Hərbi liseyi müvəffəqiyyətlə bitirdi. 5-6 il Tərtərdə xidmət etdi. Evə gəlmişdi, mən evdəkilərə dedim, Sədi evlənmək istəyir. Utanırdı desin. Amma mən ana kimi hiss edirdim balamın qəlbindən keçənləri. Toy-büsatla evləndirdik. Arzu adında qızı dünyaya gəldi. Sədi 3-cü kursda oxuyarkən atası vəfat etmişdi. Çətin vaxtları olsa da, dilə gəlib nəsə istəməzdi evdən. İkinci övladı dünyaya gələndə atası Süleymanın adını qoydu. Bölmə rəisi işlədiyi vaxtlarda çox hörmət qazanmışdı. Həmişə deyirdi, əsgərlərim mənim qardaşlarımdır. Onlara qayğı ilə yanaşırdı. Təlimlərə çox ciddi əhəmiyyət verirdi. Əsgərlər də ondan razılıq edirdilər. Bu gün onun əsgərləri ilə görüşəndə bağrıma basıram ki, bəlkə, Sədinin qoxusunu alaram. 

Beyləqana yeni köçmüşdülər ki, müharibə başladı. Döyüşə ilk qatılanlardan oldu. Ayın 27-si yoldaşı ilə sağollaşıb gedəndə deyib ki, ürəyimə damıb, şəhid olacağam. 
Gəlinim bu sözdən sonra çox narahatlıq keçirmişdi. Son danışığımız müharibəyə 3 gün qalmış oldu. Qardaşı dedi ki, Sədi, deyirlər, müharibə olacaq. Qəhqəhə çəkərək güldü. Narahat olmayaq deyə dedi, yalandı. Füzulinin Əbdürrəhmanlı kəndində şəhidliyə yüksəlib. Baxmayaraq ki, çox çətinliklə böyütmüşdüm, amma qürurluyuq. Ona görə ki, oğlumun qəlbi daim Vətən sevgisi ilə döyünürdü. Allah bütün qəhrəman şəhidlərimizə rəhmət eləsin, qazilərimizə şəfa versin. Oğullarımız Vətən üçün canlarından keçdilər ki, Vətən sağ olsun. Bayrağımız hər zaman ucalarda dalğalansın. Allah şəhidlərimizin ruhunu şad etsin.

Nəşr edilib : 09.11.2024 19:50