NAXÇIVAN :

26 Aprel 2025, Şənbə

Elektrikli avtobuslar Naxçıvanda ekoloji mühitin yaxşılaşdırılmasına töhfə verəcək

...

“Naxçıvanda ictimai nəqliyyat infrastrukturunun yaxşılaşdırılması üçün nəzərdə tutulan 60 ədəd elektrobusun Çinin böyük bir şirkəti ilə əldə olunmuş razılığa əsasən yığma üsulu ilə Azərbaycanda istehsal olunacağı nəzərdə tutulur”.

Bu sözləri “Şərq qapısı”na müsahibəsində hüquqşünas, ekspert Ərşad Hüseynov deyib.

Onun sözlərinə görə, Naxçıvan şəhərində ictimai nəqliyyatın yenidən təşkili ilə bağlı ölkə başçısının martın 4-də imzaladığı Sərəncamın bir neçə istiqamətdə çox böyük əhəmiyyəti vardır: “Sərəncam preambulasında da qeyd olunduğu kimi, əsas hədəflərdən biri ölkəmizin iqlim dəyişikliyinə qarşı mübarizədə ekoloji dayanıqlı inkişafın və ətraf mühitin dayanıqlı mühafizəsinin daha da yaxşılaşdırılması istiqamətində atılan bir addımdır. Ətraf mühitə nəqliyyatın da olduqca ciddi zərərli təsiri var ki, bu zərərli təsiri azaltmaq üçün ekoloji təmiz nəqliyyat vasitələrindən istifadə genişləndirilməlidir. Bunun üçün daxili yanma mühərrikli nəqliyyat vasitələrinin, xüsusən də daha çox yanacaq sərf edən avtobusların elektrik mühərrikli elektrobuslarla əvəz olunması şəhərdə ekoloji mühitin yaxşılaşdırılmasına və dayanıqlı mühafizəsinə töhfə verəcək. Bu Sərəncamın və onun icrasının əsas nəticələri Naxçıvan şəhərinin ictimai nəqliyyatının təkmilləşdirilməsi olacaq”.

“Ümumiyyətlə, ictimai nəqliyyat insanların həyat tərzinə və həyat keyfiyyətinə çox ciddi təsir edən amildir. Bunun üçün də ictimai nəqliyyat daha dayanıqlı sosial iqtisadi inkişaf üçün vacib zəmindir. Çünki ictimai nəqliyyat əhalinin mobilliyinin təmin olunmasında prioritet olmalıdır. Artıq dünyada belə bir tendensiya mövcuddur və bizdə bu tendensiyaya qoşulmalıyıq. Naxçıvan şəhərində ictimai nəqliyyat infrastrukturunun müasirləşdirilməsi  bu istiqamətdə artıq yeni bir addımdır. Bu həm də onun əlamətidir ki, ilk dəfə olaraq paytaxt Bakıdan başqa digər bir şəhərin ictimai nəqliyyatına çox yüksək səviyyədə diqqət göstərilir, dövlət büdcəsindən birbaşa investisiya qoyulur. Burada ciddi bir məbləğdən, 33 milyon 449 min manat vəsaitdən söhbət gedir. Ümumiyyətlə, bu Sərəncam Naxçıvanda ictimai nəqliyyatı yaxşılaşdırmaqla bərabər, həm də Azərbaycanda elektrobusların yığım yolu ilə olsa da, istehsalını  stimullaşdıracaq. Bu dövlət sifarişidir və həmin sahənin inkişafı öz dəstəyini alacaq. Bu addım həm də gələcəkdə digər böyük şəhərlərimizdə də ictimai nəqliyyatın yaxşılaşdırılması sahəsində adddımların atılması üçün mühüm faktordur”, – deyə Ərşad Hüseynov vurğulayıb.

Cavanşir BAĞIRLI

Nəşr edilib : 05.03.2025 17:34