NAXÇIVAN :

27 Aprel 2025, Bazar

Əcnəbi tələbələr Novruz təəssüratlarını dilə gətirdilər

...

Baharın gəlişi bizə həm də xalqımızın ən əziz bayramı olan Novruzu gətirir. Bu bayram o qədər gözəldir ki, təkcə yerli əhali deyil, ölkəmizdə yaşayan xarici vətəndaşlar da Novruzu xüsusi qeyd edir. Biz də  elə həmin vətəndaşlardan biri, muxtar respublikamızda ikinci Novruzunu  qeyd edən Emre Bayrakçekenlə həmsöhbət oluruq. Türkiyənin Tekirdağ şəhərindən gələrək burada Naxçıvan Dövlət Universitetinin Tibb ixtisasında təhsil alan 35 yaşlı müsahibimiz xalqımızın bu əziz bayramını çox sevdiyini bildirir və deyir: “Artıq iki ildir ki, Naxçıvanda yaşayıram. İlk dəfə keçən il Novruz bayramını burada qeyd etdim. Naxçıvanda bu bayramın necə coşqu, təntənə ilə keçirildiyinin şahidi oldum və bu il də bayramı burada keçirmək qərarına gəldim”.  
Həmçinin  Novruzda süfrələrimizin bəzəyi olan ən dadlı təamlardan söhbət açan Emre bayramda xanımlarımızın bişirdiyi şirniyyat və yeməkləri xoşladığını, Naxçıvan çöçəsi və şəkərburanın isə çox sevdiyi bayram şirniyyatları olduğunu deyir. 

Digər müsahibimiz Joseph Uwezele Opamendir. Joseph də şəhərimizdə yaşayıb təhsil alan əcnəbi tələbələrdəndir. Əslən Nigeriyadan olan Joseph Naxçıvan Dövlət Universitetində Tibb ixtisası üzrə təhsil alır. Altı ildən çoxdur ki, Naxçıvanda yaşayan müsahibim bildirir ki, təhlükəsiz və insanları çox səmimi olduğundan burada yaşamağı sevir.
Bayram təəssüratlarından bəhs edən  müsahibimiz deyir: “Novruz bayramı çox gözəldir. İlk dəfə 2019-cu ildə bu bayramda iştirak etdim. Hətta Naxçıvanqalada təşkil olunmuş bayram tədbirində çıxışım da oldu. İlk dəfə boyanmış yumurtaları görəndə isə çox təəccüblənmişdim. Çünki bu mənə çox maraqlı gəlirdi. Məncə, bu böyük bayramdır. Mən də görürəm ki, xaricdə yaşayan bütün azərbaycanlılar bayramı qeyd etmək üçün doğma Vətənə qayıdırlar”.
Joseph deyir ki, ailəmə, yaxınlarıma bu bayram haqqında məlumat verdikdə onlar üçün də bu çox maraqlı gəlir. 
Novruz şirniyyatlarından paxlavanı sevdiyini söyləyən müsahibimiz isti yeməklər içərisində ən çox şah plovu sevdiyini deyir.
Novruz adətlərindən və bayram xatirələrindən bəhs edən müsahibimiz yumurta döyüşdürməyi də çox sevdiyini söyləyir. Sonda Joseph xalqımızı əziz bayram münasibətilə təbrik edərək xoşbəxtlik və firavanlıq arzuladı.  

Türkanə ƏSƏDOVA 

Nəşr edilib : 21.03.2025 20:45