NAXÇIVAN :

26 Aprel 2025, Şənbə

“Deutsche Welle”nin qərəzli verilişi – jurnalistikaya zidd gedişat

...

Ölkəmizin beynəlxalq arenada qazandığı uğurlar bəzi Qərb dövlətlərində açıq və ya gizli qərəzli münasibətə səbəb olub. 44 günlük Vətən müharibəsindən sonra regionda yeni geosiyasi reallıqlar formalaşıb. Azərbaycan beynəlxalq hüququn və tarixi ədalətin tərəfində dayanaraq ərazi bütövlüyünü bərpa etməsi ilə Qərb dairələri və media qurumları, xüsusilə də erməni lobbisinin təsiri altında olan fransız və alman mediası Azərbaycanın haqlı mövqeyini təhrif etməyə çalışır.

Son günlər Almaniyanın “Deutsche Welle” (DW) yayımçısı tərəfindən efirə verilən “Ermənistanın Qafqazda torpaq və kimlik uğrunda mübarizəsi” adlı veriliş açıq-aşkar manipulyasiya və dezinformasiyanı özündə ehtiva edir. Bu cür materiallar obyektiv jurnalistikanın əsas prinsiplərini pozur, eyni zamanda regionda sülh səylərinə ciddi maneə yaradır.

DW-nin bu verilişi Azərbaycanın suverenliyini və tarixi həqiqətləri açıq şəkildə təhrif etməklə yanaşı, Qərbin bəzi dairələrinin Cənubi Qafqazda vəziyyəti gərgin saxlamaq maraqlarını da ortaya qoyur. Azərbaycanın apardığı uğurlu siyasət, xüsusilə enerji, nəqliyyat və diplomatik sahələrdə əldə etdiyi nailiyyətlər bəzi gücləri narahat edir. DW-nin təqdim etdiyi verilişin yayımlandığı zaman Almaniya prezidenti Frank-Valter Ştaynmayerin Ermənistana səfəri və onun rəsmi sosial media hesabında qondarma rejimin bayrağına yer verilməsi, bu prosesin təsadüfi olmadığını göstərir. Bu gedişatın Ermənistandan sonra Azərbaycana səfər edən Ştaynmayer, Almaniya hökuməti və Azərbaycan arasındakı əlaqələrə təsirini rəsmi məlumatdan öncə söyləmək çətindir.

Azərbaycan hökuməti və ictimaiyyəti DW-nin qərəzli mövqeyinə qarşı dərhal reaksiya verdi  Azərbaycan Mətbuat Şurası və Qərbi Azərbaycan İcması bu hadisəni jurnalistikanın prinsiplərinə qarşı yönəlmiş, açıq-aşkar qərəzli bir kampaniya kimi qiymətləndirdi. Media və diplomatik təzyiqlər nəticəsində Almaniya prezidenti administrasiyası yanlışlığı qəbul edərək üzrxahlıq bildirdi. Lakin bu cür hallar bir daha göstərir ki, Qərb mediasında müəyyən dairələr erməni lobbisinin təsiri altında qalmağa davam edir.

DW-nin hazırladığı materialın təktərəfli olması və yalnız erməni ekspertlərin fikirlərini ehtiva etməsi jurnalistikanın əsas prinsiplərindən olan obyektivlik və balans prinsiplərinin pozulmasıdır. Verilişdə azərbaycanlı qaçqınların görüntülərinin ermənilər kimi təqdim edilməsi isə dezinformasiya xarakteri daşıyır və Azərbaycan ictimaiyyətini qəsdən təxribata çəkmək məqsədi güdür. Bu isə beynəlxalq jurnalistikada qeyri-etik davranış kimi qiymətləndirilir.

Qərb mediasında Azərbaycanın uğurlarına qarşı aparılan bu cür kampaniyalar təsadüfi deyil və böyük ehtimalla müəyyən siyasi dairələrin sifarişi ilə həyata keçirilir. DW-nin təqdim etdiyi verilişin tonu dini və etnik bölücülüyü təşviq edir, bu isə regionda sülh və təhlükəsizliyin əleyhinə yönəlmiş bir addımdır.

Azərbaycan cəmiyyəti və medianın bu cür təxribatlara qarşı güclü mövqe sərgiləməsi vacibdir. Beynəlxalq informasiya müharibəsində Azərbaycan mediasının fəallığı və xarici media ilə effektiv əlaqələri bu cür dezinformasiyalara qarşı güclü bir cavab rolunu oynayacaqdır.

Açıq danışsaq bu “DW”nin ilk qərəzli addımı deyil. Nəticə olaraq, “Deutsche Welle” kimi nüfuzlu bir media orqanının jurnalistika prinsiplərinə sadiq qalması və obyektivliyə riayət etməsi üçün ciddi tədbirlər görülməlidir. Azərbaycan ictimaiyyəti və rəsmi qurumları bu cür hallara qarşı prinsipial mövqe nümayiş etdirməklə regionda həqiqətin və sülhün qorunmasına töhfə verə bilər.

 Rafiq TƏHMƏZ

Nəşr edilib : 02.04.2025 15:07