NAXÇIVAN :

26 Aprel 2025, Şənbə

4 gün, 4 il sonra 44 gündə əbədi qələbə oldu

...

Gecənin sükutunu yeri-göyü titrədən silah səsləri pozmağa başlayanda sanki yerlə göy birləşirdi. Hər kəs şirin yuxudan ayılıb kəndin küçələrinə axışırdı. Axı illərdir, bu yerin sakinləri silah səsinə yatıb, oyanırdılar. İllərdir, güllə yağışının əlindən əzizlərini ziyarətə gedə bilmirdilər. Amma ki, əvvəllər silah səsi eşidəndə təşvişə düşən insanlardan əsər-əlamət yox idi həmin gecə. Çünki onlar artıq öz dövlətinə, ordusuna güvənirdi. Ali Baş Komandana inanırdı. Vaxtilə ordusu, gücü olmadığı üçün evini tərk etmiş xocalılılar, şuşalılar, laçınlılar...

Səbri də tükənmişdi artıq onların. Səngərdə dayanan əsgərin də səbir kasası daşmışdı həmin gecə. İllərdir, ürəyimizdə qaysaq qoyan yaranın qabığı qopmuşdu artıq. Azərbaycan əsgəri xalqından güc alıb irəli atılmışdı. Alazanların səsindən qulaq tutulsa da, heç kəs cəbhə kəndlərini tərk etmək fikrində deyildi. Yurdundan didərgin düşməyin acısı ilə yaşayan ailələr yaxşı dərk edirdi nələrin baş verdiyini. Kənd camaatı artıq duymuşdu başımızın üstündən keçib düşmən hədəflərini dağıtmağa gedən mərmilərdən çıxan qığılcımların qələbəyə gedən yolun ilk işığı olduğunu. Həmin gecə ta səhər dan yeri ağarana kimi susmaq bilmədi silahlar. Bütün cəbhəboyu kəndlər gözünü bir an belə yummadı. Dörd gün, üç gecə. Hamı cəbhədən gələn xəbərləri sevinclə qarşıladı. Düşmən mərmisinə tuş gəlib dağılan evlər heç kimin kefini poza bilmirdi. Üçrəngli bayrağa bükülüb gələn tabutlar alqışla qarşılanırdı. Axı onlar bizə az qala dadını unutduğumuz qələbəni gətirmişdi. Yollarda olan gözlərə işıq, Vətən həsrəti ilə döyünən qəlblərə təpər vermişdi.

Tarixə 4 günlük müharibə, Aprel döyüşləri kimi yazıldı həmin günlər. Aprel döyüşləri qələbəyə gedən yolda çıraq oldu. Ümid işığı yandı bütün ürəklərdə. Qarabağa qayıtmaq ümidi oldu Lələtəpə, Talış yüksəklikləri. Cocuq Mərcanlının ən yüksək yerinə sancılan Azərbaycan Bayrağı hər kəsin qəlbində sevinc atəşi yandırdı. Cəmi altı ay sonra düşmənin xarabaya çevirdiyi Cocuq Mərcanlı cənnətə çevrildi. İllərdir, düşmən gülləsi ilə bağrı yarılan Vətən torpağında baharın al çiçəkləri açdı.

Həmin gün heç kimin ağlına belə gəlməzdi ki, cəmi 4 il sonra 4 gündə başlayan zəfər yolu 44 gündə Şuşaya gedib çatacaq.

Biz illərlə Qarabağın başıqarlı dağlarını lap uzaqdan seyr etdikcə ürəyimiz yananda, hər bahar gələndə dağlarda açan çiçəklərə baxıb kaş o gün olardı, öz evimizdə ocağımız yanardı deyəndə də ürəyimizdəki ümid sonsuz idi. Biz əmin idik ki, qələbə bizim olacaq. Bu xalq həmin 4 gündə qələbəni dadmışdı. Bu şanlı zəfər, 4 günlük döyüşün sonunda qazanılan qələbə xalqın öz ordusuna inamını daha da artırdı. Biz əmin olduq ki, sülh yolu ilə olmasa belə hərbi yolla torpaqlarımızı işğaldan azad edəcək ordumuz. Həmin günlərdə öz siyasi libasını hərbi forma ilə əvəz edib döyüş bölgəsinə səfər edən Azərbaycan Respublikasının Prezidenti, Ali Baş Komandan cənab İlham Əliyev Aprel döyüşlərinin iştirakçısı olan hərbçilərlə görüşdə deyib: “Aprel döyüşləri bizim şanlı hərbi qələbəmizdir, dövlətimizin, xalqımızın, ordumuzun gücünü göstərən qələbədir. Aprel döyüşləri nəticəsində Füzuli, Cəbrayıl və Ağdərə rayonlarının işğaldan azad edilmiş ərazilərində bu gün Azərbaycan Bayrağı dalğalanır. Bu döyüşlər onu göstərir ki, Azərbaycan xalqı və dövləti heç vaxt işğalla barışmayacaq, öz ərazi bütövlüyünü nəyin bahasına olursa-olsun, bərpa edəcəkdir”.

Və artıq biz beş ildir ki, həmin görüşdə deyilən sözlərin sübuta yetirilməsinin sevinci ilə fərəhlənirik. Biz şanlı ordumuzun tarixə yazdığı qələbələri sadalamaqdan qürur duyuruq. Tarixin səhifəsinə öz qanı ilə 4 gündə zəfər yazan oğullarımızın şanlı mübarizəsinin davamını 44 gündə seyr edib dünyanın ən xoşbəxt xalqı olmaq sevincini yaşayırıq. Bəli, bu il, 2025-ci ildə Vətən savaşındakı şanlı qələbənin beş, Aprel zəfərinin isə doqquzuncu ildönümünü fərəhlə qeyd edirik. Və şəhid məzarları önündə başı dik, alnıaçıq dayanıb “Zəfər yazan oğullar, ruhunuz şad olsun!”  – deyirik. Artıq Vətən bağında açan lalələri düşmən yox, biz seyr edirik. Cocuq Mərcanlıdakı məsciddən yüksələn azan səsi Şuşada, Laçında eşidilir. “Qarabağ şikəstəsi” bütün dünyaya səs salır. Və bu xalq bir yaz səhərində qəlbimizə işıq salan Aprel günəşinin bir payız günündə bütün Azərbaycanı nura qərq etdiyi günləri heç vaxt unutmur, Vətən oğullarını minnətdarlıqla anırıq.

Ramiyə ƏKBƏROVA

Nəşr edilib : 02.04.2025 19:12