Bakıda bədii gimnastika üzrə Dünya Kubokuna yekun vurulub

Milli Gimnastika Arenası aprel 17-19-da möhtəşəm idman bayramına ev sahibliyi edib.
"Şərq qapısı" xəbər verir ki, bədii gimnastika üzrə keçirilən Dünya Kubokunda 42 ölkədən 150-dən çox gimnast iştirak edərək, tamaşaçılara unudulmaz anlar yaşadıb.
Üç gün davam edən yarışın ilk iki günü təsnifat mərhələsinə, sonuncu günü isə həyəcanlı finallara həsr olunub. Təsnifat mərhələsində fərdi gimnastlar halqa, top, gürzlər və lent alətləri ilə bacarıqlarını nümayiş etdiriblər. Çoxnövçülük üzrə nəticələrə əsasən, Ukraynanı təmsil edən Taisiia Onofriiçuk birinci yerə layiq görülüb.
Qrup hərəkətləri proqramında gimnastlar 3 halqa və 2 cüt gürz ilə çıxış edərək yüksək peşəkarlıq göstəriblər. Çoxnövçülük üzrə qalib İsrail komandası oldu. İspaniya ikinci, AIN 2 komandası isə üçüncü pillədə qərarlaşdı.
Final mərhələsində isə mübarizə daha da gərgin keçdi. Halqa proqramında qızıl medalı Taisiia Onofriiçuk qazanıb. Top proqramında və gürzlər üzrə çıxışlarda Darya Varfolomeev birinci olub. Lent proqramında da o, birinciliyini qoruyub.
Qrup hərəkətlərində 5 top proqramında İsrail komandası fəxri kürsünün ən yüksək pilləsinə yüksəlib. 3 halqa və 2 cüt gürz proqramında isə İspaniya qızıl medal qazanıb.
Ənənəyə uyğun olaraq, təsnifat mərhələsində ən yüksək nəticə göstərən gimnast və komanda “AGF Trophy” kuboku ilə təltif olunub. Bu mükafata fərdi proqramda Darya Varfolomeev, qrup hərəkətlərində isə AIN 2 komandası layiq görülüb.