NAXÇIVAN :

19 Aprel 2026, Bazar

Azərbaycan XİN başçısı: UNESCO ilə əməkdaşlığın prioritet istiqamətləri süni intellekt və elmi diplomatiyadır

...

Azərbaycanın UNESCO ilə əməkdaşlığının prioritetləri süni intellekt (AI) və elmi diplomatiyadır.

"Şərq qapısı" xəbər verir ki, bunu Azərbaycanın xarici işlər naziri Ceyhun Bayramov UNESCO-nun Səmərqənddə keçirilən 43-cü Baş Konfransında çıxışı zamanı bildirib.

"UNESCO ilə əməkdaşlığın prioritet istiqamətləri süni intellekt və elmi diplomatiyadır. Azərbaycan AI-dən məsuliyyətli və etik istifadəni dəstəkləyir, rəqəmsal uçurumun aradan qaldırılmasına və elmi biliklərə bərabər çıxışa töhfə verir", - o qeyd edib.

Onun sözlərinə görə, UNESCO üzrə Azərbaycan Respublikasının Milli Komissiyası 2030-Gündəliyinin lokallaşdırılmasına yönəlmiş birgə təşəbbüslər, regional əməkdaşlıq və gənclər üçün proqramlar vasitəsilə tərəfdaşlığı gücləndirməyə hazırdır.

Nazir qeyd edib ki, 2022-2023-cü illərdə Azərbaycan Afrikanın 24 ölkəsindən olan UNESCO üzrə milli komissiyalar üçün mədəni irsin qorunması üzrə təlim sessiyaları təşkil edib.

"2030-cu ilə qədər Dayanıqlı İnkişaf Gündəliyinə, əsasən də inklüziv və keyfiyyətli təhsili və ömürboyu təhsil almağı nəzərdə tutan Məqsəd 4-ə xüsusi diqqət yetirilir. Azərbaycan Afrikada savadlılıq, qızların hüquq və imkanlarının genişləndirilməsi və təhsildə gender bərabərliyinin təşviqi sahəsində layihələri dəstəkləyir", - o vurğulayıb.

C.Bayramov əlavə edib ki, Azərbaycan mədəniyyətlər və dinlər arasında dialoq, əməkdaşlıq, qarşılıqlı anlaşma və hörmətə dəyər verir: "Ölkə bu konsepsiyanı rəhbər tutaraq 2008-ci ildə başladılan və UNESCO-nun İcraiyyə Şurasının dəstəklədiyi Bakı Prosesi vasitəsilə mədəniyyətlərarası və dinlərarası dialoqu dünyada təşviq edir".

Nəşr edilib : 31.10.2025 15:54