03 Mart 2021, Çərşənbə

Kəngərli rayon Mədəniyyət Sarayında rayon üzrə fəaliyyət göstərən  uşaq müəssisələrinin, o cümlədən ümumtəhsil məktəbləri, məktəbəqədər və məktəbdənkənar təhsil müəssisələrinin  sanitar-gigiyenik vəziyyəti ilə bağlı maarifləndirici seminar keçirilmişdir. Tədbirdə Kəngərli rayonunda fəaliyyət göstərən uşaq müəssisələrinin metodist, tibb bacısı və müvafiq sahəyə məsul olan digər şəxsləri iştirak etmişdir.

Tədbiri giriş sözü ilə açan Kəngərli  Rayon İcra Hakimiyyəti  Aparatının əməkdaşı Kənan Məmmədov tədbirin mahiyyəti və əhəmiyyəti barədə seminar iştirakşılarına ətraflı məlumat vermişdir.

Sonra Naxçıvan Muxtar Respublikasının Ailə, Qadın və Uşaq Problemləri üzrə Dövlət Komitəsi Aparatının rəhbəri Eltun Həziyev tədbirin keçirilməsinin zəruriliyindən bəhs edərək bildirmişdir ki, muxtar respublikada dövlət uşaq siyasətinin inkişaf göstəricilərini, məktəbəqədər müəssisələr, ümumtəhsil məktəbləri və məktəbdənkənar müəssisələrdən, eləcə də onların maddi-texniki təminatından, müasir tipli infrastrukturlarından real şəkildə müşahidə edə bilərik. Bu müəssisələrin fəaliyyətə başlaması və fəaliyyətinin təmin olunması ilə yanaşı bu gün onların saxlanılma şəraiti, eləcə də sanitar-gigiyenik normalara əməl olunması əsas şərtlərdəndir.

Bildirmişdir ki, muxtar respublikada fəaliyyət göstərən dövlət uşaq müəssisələrində il ərzində  Naxçıvan Muxtar Respublikası Nazirlər Kabineti yanında Yetkinlik Yaşına Çatmayanların İşləri və Hüquqlarının Müdafiəsi üzrə Komissiyanın ekspert qrupu tərəfindən monitorinqlər keçirilir. Bu baxımdan bu gün keçirilən maarifləndirici seminar həmin müəssisələrdə sanitar-gigiyenik normaların daha da təkmil təmin olunmasını, aparılan işlərin daha da yüksək səviyyədə görülməsi və onların həyata keçirilmə metodlarını aşılamaqdan ibarətdir.

          Həmçinin qeyd etmişdir ki, müvafiq sahədə sanitar-gigiyenik vəziyyətə məsul olan şəxslər öz işlərinə biganə yanaşdıqda Azərbaycan Respublikasının sanitariya qanunvericiliyini pozmağa görə məsuliyyət daşıyırlar.

Daha sonra Naxçıvan Muxtar Respublikasının Təhsil Nazirliyi Aparatının Ümumtəhsil məktəbləri və liseylərlə iş üzrə şöbəsinin müdiri Abdulla Əsgərov muxtar respublikamızda təhsilin inkişafından danışaraq qeyd etdi ki, təhsil müəssisələrinin maddi-tədris bazası möhkəmləndirilir. Ötən dövr ərzində muxtar respublikamızda təhsil müəssisələri tikilmiş  və ya əsaslı şəkildə yenidən qurulmuşdur.

Təhsilə dövlət qayğısı təkcə məktəb tikintisi ilə yekunlaşmamışdır. Muxtar respublikada pedaqoji kadr hazırlığındakı təkmilləşmələr, fənn kurikulumları və təhsil standartlarının tətbiqi, informasiya kommunikasiya texnologiyalarına təlim prosesində geniş yer ayrılması, milli-mənəvi irsimizin öyrənilməsi üçün interaktiv əlaqələrin təşkili, nümunəvi dərslərin tədrisi, distant təhsilin reallaşdırılması təhsil sahəsində uğurların qazanılmasına şərait yaratmışdır. Bütün təhsil müəssisələrində təhsilalanlar Səhiyyə Nazirliyi tərəfindən tibb xidməti ilə təmin edilmişlər. Bir sıra ümumtəhsil məktəblərində isə ayrıca tibb işçiləri fəaliyyət göstərirlər. Müvafiq müəssisələrdə tibb xidməti müəssisənin iş rejiminə uyğun şəkildə təşkil edilir. Təhsilalanların profilaktik müayinəsi, profilaktik peyvəndlərin aparılması müəssisə rəhbərliyi ilə əvvəlcədən razılaşdırılmış qrafik əsasında həyata keçirilir.

Abdulla Əsgərov hazırda əhalinin, xüsusən məktəbyaşlı uşaqların sağlamlığının qorunmasından, onların müayinə və müalicəsinə göstərilən diqqətdən, dispanserizasiyanın təşkilindən geniş bəhs edərək, bütün təhsil müəssisələrində tibbi xidməti sanitariya norma və qaydalarına uyğun təşkil olunması üçün səylərin daha da artırılacağını bildirdi.

Naxçıvan Muxtar Respublikası Gigiyena və Epidemiologiya Mərkəzinin Sanitar-gigiyena şöbəsinin müdiri Elxan Orucəliyev ümumtəhsil məktəblərində və məktəbdənkənar təhsil müəssisələrində olan sanitar-gigiyenik vəziyyət barədə ətraflı məlumat verərək bildirmişdir ki, uşaqların hərəki fəaliyyəti üçün müvafiq şərait yaradılmalı, uşaqlar üçün binada və həyətində kifayət qədər  sahə olmalıdır.

Eyni zamanda əlverişli istilik-hava şəraiti yaradılmalı, uşaq müəsissələrinin sanitariya abadlığı ventilyasiya, isitmə və işıqlanmanın gigiyenik cəhətdən düzgün təşkil  edilməlidir. Uşaqların daim hərəkətdə olması, otaqlarda kifayət qədər hava mübadiləsinin olmasını tələb edir.

Elxan Orucəliyev qeyd etmişdir ki, dərs ilinin əvvəlində və hər tətildən sonra tibb bacısı tərbiyəçilərlə birlikdə 2-3 gün ərzində bütün uşaqları profilaktik baxışdan keçirməlidirlər. Xəstə olanlar təcili həkimə göstərilməli, direktorluq və sinif rəhbərinə xəbər verilməlidir.

Uşaqların səhhətini və kliniki göstəricilərini nəzərə alaraq həkim lazım bilirsə, onlar üçün rəhbərlikdən əlavə istirahət günü tələb etməlidir. Bütün uşaqların sağlamlığına aid olan tədbirlərə tibb işçiləri və müəllimlər daim nəzarət edib, yüksək məsuliyyətlə yerinə yetirməlidirlər. Gələcək nəslin sağlamlığını qorumaq və yaxşılaşdırmaq üçün öz vəzifə borcları tam yerinə yetirilməli və bütün imkanlardan istifadə edilməlidir.

Uşaqların müqaviməti yüksəldilməlidir, çünki II sağlamlıq qrupuna aid olanlar da “risk” qrupuna aiddir, onlar tez-tez xəstələnir və immuniteti zəif olan uşaqlardır. Bu uşaqların xroniki xəstəliklərə düçar olmamaları üçün onlar daim diqqətdə saxlanılmalıdırlar. III, IV, V sağlamlıq qruplara aid olanlar müxtəlif ixtisaslı həkimlərin nəzarətində müalicə olunmalı və qoruyucu rejimdə yaşamalıdırlar. Uşaq müəssisələrində təhsil alan uşaqların, dişlərində kariyes xəstəliyi, dayaq-hərəkət sisteminin patologiyası, yastı pəncəlilik, qurd xəstəliyi aşkar olan uşaqlar, xüsusi idman qruplarına aid olanlar vaxtlı-vaxtında lazımi müalicə-profilaktik tədbirləri ilə daim təmin olunmalıdırlar.

Həmçinin bildirmişdir ki, ümumtəhsil məktəblərində və məktəbdənkənar müəssisələrində uşaqların sağlamlığı ilə əlaqədar müəssisədaxili tələblər mövcuddur. Belə ki, uşaq müəssisələrində uşaqların sağlamlıqlarının qorunması, möhkəmləndirilməsi və yoluxucu xəstəliklərin profilaktikası məqsədilə sanitar-gigiyena tələblərinə əməl edilməli, uşaqlara şəxsi gigiyena vərdişləri (əllərin sabunla yuyulması, dişlərin   fırçalanması, dırnaqların və paltarların təmizliyi)  aşılanmalı, infeksion xəstəliyə yoluxmuş uşaqların həmin xəstəliyə məxsus karantin müddəti bitməmiş müəssisəyə buraxılmaması (məs: qripdə 5 gün, su çiçəyi, qızılcada 20-21 gün) təmin edilməlidir. Həmçinin müəssisənin ümumi  sanitar  vəziyyətinin  yaxşılaşdırılması üçün, ayda bir dəfə “sanitariya günü” keçirməlidir.

Eyni zamanda müəssisələrdə aparılan təmizlik və dezinfeksiya işlərinə, sanitar qovşaqların hər gün 1%-li xlor məhlulu ilə silinməsinə, dərs otaqlarının döşəmə və divarlarının, soyunub-geyinmə otaqlarının, bufetin döşəməsinin, tibb məntəqəsinin, dəhlizlərin həftədə 1 dəfə 0,5 %-li xlor məhlulu ilə silinməsinə nəzarət edilməlidir.

Dezifeksiyaedici maddələr (xlorlu əhəng və s.) vaxtlı-vaxtında ərazi Gigiyena Epidemiologiya Mərkəzlərindən tələbnamə ilə götürülməli, pedikulyozun aşkarlanması məqsədilə hər ay seçmə yolu ilə 4-5 qrupda tibb işçiləri tərəfindən şagirdlərə baxış keçirilməlidir. Müəsissədə epidemioloji vəziyyət yaranarsa, bufetdə işlədilən qab-qacağın (stəkan, nəlbəki və s.) 2%-li çay sodası məhlulunda qaynadılma yolu ilə dezinfeksiyasına nəzarət edilməlidir. Müəssisənin bufetlərinə daxil olan ərzaqların  təhlükəsizliyinə diqqət edilməlidir.

Həmçinin bildirmişdir ki, yeməkxanası olan müəsissələrdə gündəlik menyunun tərtibində iştirak edilməli, hər gün hazırlanan yeməyin gündəlik nümunəsi götürülüb qapalı şüşə qabda 48 saat 2-6 dərəcədə soyuducuda saxlanılmalıdır.

Bütün uşaq müəssisələrinin işçiləri, o cümlədən qida blokunda və ya bufetdə çalışan işçilər vaxtlı-vaxtında tibbi müayinələrdən keçməlidirlər.

Sonda tədbir iştirakçılarına müvafiq sahə ilə əlaqədar hazırlanmış bukletlər paylanılmışdır.

 

 

 

ARXİV

Mart 2021
Be Ça Ç Ca C Ş B
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 31 1 2 3 4

MÜƏLLİFLƏR

KEÇİDLƏR