21 Aprel 2021, Çərşənbə

İranın cənub-qərbində zəlzələ olub.

5,6 bal gücündəki zəlzələ Kohqiluyə və Buyir-Əhməd əyalətində baş verib.

Tehran Universiteti Seysmologiya Mərkəzindən bildirilib ki, əyalətin Dena rayonunda qeydə alınan zəlzələnin ocağı 10 kilometr dərinlikdə yerləşib.

Zəlzələ nəticəsində azı 10 nəfərin yaralandığı bildirilir. Ölənlər haqqında məlumat hələ ki, yoxdur.

Gedirik Naxçıvan şəhərinin Tumbul kəndinə, şəhid İbrahim İbrahimovun ailəsi ilə görüşməyə. Qəlbimdəki təlatüm bambaşqa duyğular yaradır məndə. Hər şeydən əvvəl, qürurluyam ki, Naxçıvan torpağı  belə vətənpərvər, igid, qeyrətli oğullar yetirir. Digər tərəfdən, “şəhidlik” adlı uca məqama yüksələn bu Vətən övladının ailəsini danışdırmaq, qanayan yaralarının qaysağını yenidən qanatmaq mənim üçün də çətindir. Nə qədər çətin olsa da,  şəhidlərimizin həyat hekayələrini oxucularla bölüşməyə çalışırıq. 

Ardını oxu...

Fevralın 17-də Azərbaycan Respublikasının Müdafiə naziri general-polkovnik Zakir Həsənov Özbəkistan Respublikasının ölkəmizdəki fövqəladə və səlahiyyətli səfiri Bahrom Aşrafxanov ilə görüşüb.

Müdafiə Nazirliyindən verilən məlumata görə, səfiri salamlayan Müdafiə naziri bildirib ki, ölkələrimiz arasında həyata keçirilən ikitərəfli hərbi əməkdaşlıq dostluq və qardaşlıq münasibətləri üzərində qurulub. Nazir qeyd edib ki, bütün sahələrdə olduğu kimi müdafiə sahəsində də əlaqələrimiz ölkələrimizin maraqlarına uyğun uğurla inkişaf edir.
General-polkovnik Z.Həsənov səfirə ordu quruculuğu sahəsində keçirilən islahatlar və əldə olunan nailiyyətlər barədə də məlumat verib.

Ardını oxu...

Qeyri-formal yollarla əldə edilmiş bilik, bacarıq, səriştə və təcrübələrin qiymətləndirilməsini istəyən şəxslər bunun üçün ərizə ilə müraciət edə bilərlər.

Bunu təhsil naziri Emin Əmrullayev sosial şəbəkədəki səhifəsində yazıb.

Nazir bildirib ki, Təhsildə Keyfiyyət Təminatı Agentliyi qeyri-formal və informal yollarla əldə edilmiş bilik, bacarıq, səriştə və təcrübələrin qiymətləndirilməsini həyata keçirir. Bu proses çərçivəsində vətəndaş fərdi qaydada yiyələndiyi ixtisas üzrə Təhsildə Keyfiyyət Təminatı Agentliyinə ərizə ilə müraciət edə və qiymətləndirmədə bilavasitə iştirak edə bilər.

Komissiya tərəfindən qiymətləndirilmə aparıldıqdan sonra yüksək nəticə göstərmiş ərizəçilər dövlət nümunəli sənədlə (sertifikatla) təltif olunacaqlar. Nazirlər Kabinetinin qərarı ilə təsdiq olunan müvafiq qaydaya əsasən öz peşə ixtisası üzrə bütün modullardan sertifikat əldə edən vətəndaşlara ilk peşə təhsilinə bərabər dövlət nümunəli diplom verilir.

Azərbaycan Respublikasında koronavirus (COVID-19) infeksiyasına 154 yeni yoluxma faktı qeydə alınıb, 165 nəfər müalicə olunaraq sağalıb.

Nazirlər Kabineti yanında Operativ Qərargahdan Trend-ə verilən məlumata görə, COVID-19 üçün götürülən analiz nümunələri müsbət çıxmış 2 nəfər vəfat edib.

Azərbaycan Xarici İşlər Nazirliyi Ceyhun Bayramov və Rusiya xarici işlər naziri Sergey Lavrov arasında telefon danışığı ilə bağlı məlumat yayıb.

Nazirlikdən  verilən məlumata görə, tərəflər bölgədə mövcud olan cari vəziyyəti, o cümlədən 10 noyabr 2020-ci il, 11 yanvar 2021-ci il tarixli üçtərəfli bəyanatların icrası ilə bağlı məsələləri müzakirə ediblər.

Söhbət zamanı, həmçinin qarşılıqlı maraq doğuran digər məsələlər ətrafında fikir mübadiləsi aparılıb.

XXX

Rusiyanın Xarici İşlər Naziri Sergey Lavrov və Azərbaycanın Xarici İşlər Naziri Ceyhun Bayramov arasında telefon danışığı baş tutub.

Trend-in Rusiya Xarici İşlər Nazirliyinə istinadən məlumatına görə, nazirlər Rusiya, Azərbaycan və Ermənistan liderlərinin 11 yanvar 2021-ci ildə Moskvada əldə etdikləri razılaşmaların həyata keçirilməsini, həmçinin ikitərəfli və beynəlxalq gündəliyin bir sıra aktual məsələlərini müzakirə ediblər.

Azərbaycandan hava yolu ilə Türkiyə, Rusiya, Ukrayna və Gürcüstana səfər edən şəxslərdən tələb edilən sənədlər müəyyənləşib.

Bu barədə Dövlət Miqrasiya Xidmətinin (DMX) rəisi Vüsal Hüseynov bildirib.

Onun sözlərinə görə, Rusiya, Ukrayna və Türkiyəyə səfər edən şəxslər uçuşdan 48 saat əvvəl alınmış COVID-19 testinin (PCR metodu ilə) neqativ nəticəsi. (Rusiyaya üçün test nəticəsini göstərən tibbi arayış rus və ya ingilis dilində olmalıdır. Türkiyəyə səfər edən 6 yaşa çatmamış uşaqlardan test nəticəsi tələb olunmur).

Ardını oxu...

İndoneziya Respublikasının Nümayəndələr Palatasında fəaliyyət göstərən İndoneziya-Azərbaycan Parlamentlərarası dostluq qrupunun sədri Məhəmməd İqbal, Xocalı qətliamının 29-cu ildönümü ilə əlaqədar sözügedən qrupun adından Bəyanat verib.

Azərbaycanın İndoneziyadakı səfirliyindən verilən məlumata görə, bəyanatda 1992-ci ilin fevral ayının 25-dən 26-a keçən gecə Azərbaycanın Xocalı şəhərinin mülki əhalisi qətliama məruz qaldığı, qətliam nəticəsində 106-ı qadın, 63-ü uşaq və 70-i qoca olmaqla, 613 nəfərin qətlə yetirildiyi, yüzlərlə insanın ağır yaralandığı və 1275 nəfərin əsir götürüldüyü qeyd olunub.

Qrup, Xocalı qətliamının insanlıq tarixində böyük bir ləkə olduğunu, Xocalı qətliamının təşkil edilməsinə görə məsuliyyət daşıyan şəxslərin cəzalandırılmalı olduğunu vurğulayıb. Habelə, Ermənistan-Azərbaycan münaqişəsinin ən qara səhifəsi olan, 29 il bundan əvvəl Azərbaycanın Dağlıq Qarabağ bölgəsində törədilmiş Xocalı qətliamının qurbanlarının xatirəsinin qrup tərəfindən dərin kədər və təəssüf hissi ilə yad edildiyi, sözügedən qətliam nəticəsində həlak olanlara Allahdan rəhmət dilədikləri, onların ailə üzvlərinə və Azərbaycan xalqına başsağlığı verildiyi qeyd olunub.

Ardını oxu...

Prezident İlham Əliyevin işğaldan azad olunmuş rayonlara səfərləri və ən əsası, bu səfərlər zamanı həmin ərazilərdə aparılan quruculuq işləri çərçivəsində inşa edilən yeni strateji obyekt və müəssisələrin təməlinin dövlətimizin başçısı tərəfindən qoyulması həm siyasi, həm iqtisadi, həm də mənəvi cəhətdən müstəsna əhəmiyyət kəsb edir.

Bu sözləri jurnalistlərə açıqlamasında Milli Məclisin deputatı, Azərbaycan Həmkarlar İttifaqları Konfederasiyasının sədri Səttar Möhbalıyev deyib.

Fevralın 14-də Prezident İlham Əliyev tərəfindən təməli qoyulan Horadiz-Ağbənd dəmir yolunun tikintisinin Azərbaycan üçün tarixi əhəmiyyət kəsb edən layihənin başlanğıcı kimi qiymətləndirilməli olduğunu deyən deputat bildirib: “İlk növbədə, qeyd etmək lazımdır ki, Prezident İlham Əliyev, birinci xanım Mehriban Əliyeva və qızları Leyla Əliyeva fevralın 14-də Füzuli, Zəngilan, Laçın və Cəbrayıl rayonlarına səfər etməklə bu ərazilərin də Azərbaycana aid olduğuna, xalqımızın bu torpaqlara artıq əbədi döndüklərinə dair növbəti dəfə bütün dünyaya açıq şəkildə mesaj ünvanlamış oldular. Məlumdur ki, hazırda Azərbaycan dövləti işğaldan azad edilmiş ərazilərdə intensiv şəkildə bərpa-quruculuq işləri həyata keçirməkdədir. Bu işlər çərçivəsində inşasına başlanılan mühüm strateji obyektlərin, müəssisələrin təməlinin Prezident İlham Əliyev tərəfindən şəxsən qoyulması görülən işlərin xüsusi diqqət mərkəzində saxlandığından xəbər verir. Füzuli rayonunda olarkən dövlətimizin başçısı Horadiz-Ağbənd dəmir yolu xəttinin təməlini qoydu. Ümumi uzunluğu 100 kilometr olacaq bu dəmir yolu xəttinin strateji əhəmiyyəti kifayət qədər böyükdür. Çünki bu nəqliyyat infrastrukturu Azərbaycan vətəndaşlarının azad olunmuş torpaqlara gediş-gəlişinin təminatında əhəmiyyətli rol oynayacaq və bu xətt Azərbaycanın əsas hissəsi ilə Naxçıvan Muxtar Respublikası arasında birbaşa dəmir yolu əlaqəsinin yaranmasına böyük töhfə verəcək”.

S.Möhbalıyev qeyd edib ki, 2020-ci il noyabrın 10-da Azərbaycan və Rusiya prezidentləri, Ermənistanın baş naziri tərəfindən imzalanmış üçtərəfli bəyanat ölkəmizin öz torpaqlarını işğaldan azad etmək uğrunda apardığı Vətən müharibəsinin Azərbaycanın tam qələbəsi ilə başa çatmasını hüquqi cəhətdən təsdiqləməklə yanaşı, həm də özündə müharibədən sonrakı dövr üçün regionun iqtisadi inkişafına dair mühüm məqamlar əks etdirir. O cümlədən Bəyanatın 9-cu maddəsində qeyd olunur ki, bölgədəki bütün iqtisadi və nəqliyyat əlaqələri bərpa edilir. Başqa sözlə desək, Naxçıvan Muxtar Respublikası ilə Azərbaycanın qərb rayonlarını birləşdirən yeni nəqliyyat kommunikasiyalarının inşası təmin ediləcək. Fevralın 14-də Prezident İlham Əliyev Horadiz-Ağbənd dəmir yolu xəttinin təməlini qoymaqla 10 noyabr Bəyanatının həmin maddəsinin icrasına start verdi. Heç şübhəsiz, bir müddət sonra biz hamımız birbaşa Naxçıvana aparan dəmir yolu xəttinin açılışının da şahidi olacağıq.

Ardını oxu...

Bu il Novruz bayramı ilə əlaqədar ölkə ərazisində 9 gün qeyri-iş günü olacaq.

Nazirlər Kabinetinin qərarına əsasən, bu il martın 20, 21, 22, 23, 24-ü Novruz bayramı günləri kimi müəyyən edilib.

Əmək Məcəlləsinin 105-ci maddəsinin 5-ci hissəsinə və Nazirlər Kabinetinin ““İş və istirahət günlərinin yerinin dəyişdirilməsi haqqında” qərarına əsasən, həftələrarası istirahət günləri iş günləri hesab olunmayan bayram günləri ilə üst-üstə düşdükdə iş və istirahət günlərinin tarixləri dəyişdirilir.

Bu il də martın 20-21-i həftənin şənbə və bazar günlərinə təsadüf etdiyindən martın 25 və 26-ı da qeyri-iş günü olacaq. Martın 27 və 28-i isə həftənin şənbə və bazar günlərinə təsadüf etdiyindən ardıcıl olaraq, 9 gün, yəni 20-28 mart qeyri-iş günü olacaq.

Azərbaycanın xarici işlər naziri Ceyhun Bayramovun ATƏT-in Minsk Qrupunun həmsədrləri və ATƏT-in fəaliyyətdə olan sədrinin şəxsi nümayəndəsi ilə videokonfrans formatında görüşü olub.

XİN-in Mətbuat xidməti idarəsindən  bildirilib ki, fevralın 16-da xarici işlər naziri Ceyhun Bayramovun ATƏT-in Minsk Qrupunun həmsədrləri İqor Popov (Rusiya Federasiyası), Stefan Viskonti (Fransa), Endryu Şofer (ABŞ) və ATƏT-in fəaliyyətdə olan sədrinin şəxsi nümayəndəsi Anji Kaspşik ilə videokonfrans formatında görüşü keçirilib.

Görüşdə tərəflər bölgədə mövcud olan cari vəziyyəti, o cümlədən 10 noyabr 2020-ci il və 11 yanvar 2021-ci il tarixli üçtərəfli bəyanatların icrası ilə bağlı məsələləri müzakirə ediblər.

Bölgədə dayanıqlı sülh və təhlükəsizliyin təmin edilməsi üçün etimadın bərpa olunması və əmin-amanlıq şəraitində birgəyaşayışın həyata keçirilməsinin vacibliyi vurğulanıb.

Daha 106 erməni hərbçinin meyiti Ermənistana verilib.

Azərbaycan tərəfi 44 günlük müharibədə həlak olan 106 erməni hərbçinin meyitini Rusiya sülhməramlılarının vasitəçiliyi ilə bu gün qarşı tərəfə verib.

Qeyd edək ki, işğaldan azad olunmuş ərazilərdən indiyədək 1379 erməninin meyitinin tapıldığı açıqlanıb.

 

 

 

Artıq məlum olduğu kimi Prezident İlham Əliyevin tapşırığına əsasən, azad edilmiş ərazilərdə qurulacaq şəhər və kəndlər “smart-city”, “smart-village”, yəni, “ağıllı şəhər”, “ağıllı kənd” konsepsiyası əsasında tikiləcək.

Dövlət Şəhərəsalma və Arxitektura Komitəsindən verilən məlumata görə, işğaldan azad edilmiş ərazilərdə şəhər və rayonların baş planlarının hazılanması ilə bağlı işlərə başlanılıb.


Prezident İlham Əliyev fevralın 14-də azad edilmiş bölgələrə səfəri zamanı Zəngilan rayonunda birinci “ağıllı kənd” layihəsinə artıq start verildiyini bildirib. Zəngilanda salınacaq birinci “ağıllı kənd” kənd məhz Ağalı olacaq.

Verilən məlumatlara görə, kənddə layihənin icrası əsasən 5 komponent üzrə aparılacaq. Bu komponentlər yaşayış, istehsal, sosial xidmətlər, “ağıllı kənd təsərrüfatı”, alternativ enerji sahələridir.

İnşa ediləcək 200 evdən ibarət kəndin enerjiyə olan tələbatı yalnız alternativ enerji mənbələrindən əldə olunacaq.

 

 

 

Siyasi partiyalara maliyyə yardımının göstərilməsi üçün 2021-ci ilin dövlət büdcəsində 4 milyon manat vəsait nəzərdə tutulub.

Maliyyə Nazirliyindən bildirilib ki, ilin birinci rübü üzrə 10 siyasi partiyaya - Yeni Azərbaycan Partiyasına, Vətəndaş Həmrəyliyi Partiyasına, Ana Vətən Partiyasına, Demokratik İslahatlar Partiyasına, Azərbaycan Demokratik Maarifçilik Partiyasına, Bütöv Azərbaycan Xalq Cəbhəsi Partiyasına, Böyük Quruluş Partiyasına, Vəhdət Partiyasına, Respublikaçı Alternativ Partiyasına və Milli Cəbhə Partiyasına ümumilikdə 857,5 min manat məbləğində vəsait ödənilib.

Vəsaitin ayrılması “Siyasi partiyalar haqqında” Qanunun 17-1-ci maddəsinə uyğun aparılır.

Fevralın 17-də gözlənilən hava şəraiti açıqlanıb.

Milli Hidrometeorologiya Xidmətindən  verilən məlumata görə, fevralın 17-də Bakıda və Abşeron yarımadasında gün ərzində arabir yağış yağacağı, gecəyə doğru yağışın sulu qara, qara keçəcəyi gözlənilir. Güclü şimal-qərb küləyi əsəcək.

Havanın temperaturu Bakıda və Abşeron yarımadasında gecə və gündüz 1-3 dərəcə isti olacaq. Atmosfer təzyiqi 760 mm civə sütunundan 756 mm civə sütununa enəcək, nisbi rütubət 80-90 faiz təşkil edəcək.

Fevralın 17-də Azərbaycanın rayonlarında hava şəraitinin arabir yağıntılı olacağı, bəzi yerlərdə sulu qar, qar yağacağı, əsasən dağlıq və dağətəyi rayonlarda intensiv və güclü olacağı gözlənilir. Ayrı-ayrı yerlərdə duman olacaq, güclü qərb küləyi əsəcək.

Havanın temperaturu gecə 2-5, gündüz 6-9 dərəcə isti, dağlarda gecə 3-8, gündüz 0-3 dərəcə şaxta olacaq.

Fevralın 17-18-də Abşeron yarımadasında güclü küləkli və yağıntılı hava şəraiti fonunda temperaturun aşağı enəcəyi gözlənilir ki, bu da meteohəssas insanlar üçün əlverişsizdir.

Bakı şəhərində Naxçıvan Muxtar Respublikasının daimi nümayəndəliyinin rəhbəri Bəxtiyar Əsgərov qardaş Türkiyə Cümhuriyyətinin Azərbaycan Respublikasında fövqəladə və səlahiyyətli səfiri Erkan Özoralla görüşüb. Görüşdə iki qardaş ölkə arasındakı münasibətlər, Naxçıvan Muxtar Respublikası ilə əlaqələr, regional vəziyyət, 44 günlük Vətən müharibəsindən sonra yaranmış reallıqlar, Naxçıvan dəhlizinin açılması, rəsmi səfərlər və digər maraqlı məsələlər ətrafında səmimi müzakirələr aparılıb.

 

 

 

Vaksindən sonra mümkün ola biləcək baş ağrısı, əzələ ağrısı, qızdırma kimi əlamətlər əks-təsir deyil, əksinə, gözlənilən nəticədir və bədənin vaksinə müsbət reaksiya verməsinin göstəricisidir.

Bu barədə TƏBİB-in yaydığı məlumatda deyilir.

Bildirilir ki, vaksin istehsal edən şirkət tərəfindən yalnız vaksin elementinə qarşı yüksək həssaslığı, vaksin vurulan zaman yüksək bədən hərarəti və ya xroniki xəstəliyinin kəskinləşmə mərhələsində olan insanlara bu preparatın vurulması tövsiyə edilmir.

Türkiyənin mərkəzi hissəsinə, o cümlədən paytaxt Ankaraya güclü qar yağıb. “RİA Novosti”yə istinadən xəbər verir ki, paytaxtda nəqliyyatın hərəkətində çətinliklər yaranıb, yolların buz bağlaması səbəbi ilə yol qəzalarının sayı artıb.

Xatırladaq ki, dünən də İstanbula güclü qar yağıb, çərşənbə gününə qədər təhsil müəssisələrində dərslər ləğv edilib və Bosfor boğazı boyunca gəmi hərəkəti dayandırılıb. Hazırda şəhərə yağan qar azalıb, ancaq avtomobillərin hərəkətində çətinlik davam edir. Yolların qardan təmizlənməsi işi aparılır. Hava limanları normal qaydada işləyir.

Sinoptiklər İstanbulda və Türkiyənin mərkəzində qar yağışının beş günə qədər davam edə biləcəyini proqnozlaşdırır.

 

 

 

Əlahiddə Ümumqoşun Ordunun Hərbi Hava Qüvvələrində taktiki-xüsusi təlim keçirilib.

Ardını oxu...

Əlahiddə Ümumqoşun Ordunun hərbi qulluqçuları Türkiyə Respublikasının Qars şəhərində keçirilmiş “Qış təlimi-2021”də ölkəmizi layiqincə təmsil edərək xidmət yerlərinə qayıdıblar.

Əlahiddə Ümumqoşun Ordunun mətbuat xidmətindən bildirilib ki, fevralın 11-də “Qış təlimi-2021”in “Yüksək Səviyyəli Müşahidəçi Günü” və döyüş atışlı mərhələsi keçirilib. Təlimin döyüş atışlı mərhələsində hərbi daşıma və hücum vertolyotlarının dəstəyi ilə desant qrupları düşmən hədəflərinin olduğu nöqtəyə irəliləyiblər.

Ardını oxu...

Əgər biz NATO çərçivəsində əməkdaşlığımızı davam etdirəcəyiksə, o zaman terrorçuların yanında yer almamalısınız.

Bunu Türkiyə Prezidenti Rəcəb Tayyib Ərdoğan İraqın şimalında PKK terrorçuları tərəfindən 13 Türkiyə vətəndaşının qətlə yetirilməsi ilə bağlı ABŞ və Qərb ölkələrinin mövqe bildirməməsini şərh edərkən deyib.

O, Qərbi terrorçuları dəstəkləməkdə ittiham edib:

"Bəs, siz PKK-nın, YPG-nin, PYD-nin yanında deyildiniz? Yanındasının və arxalarında dayanmısınız. Ölən günahsızların qanı terror təşkilatına sahib çıxan, dəstək verən, hər kəsin əlinə bulaşıb. Terror təşkilatlarının təbliğat vasitəsinə çevrilmiş sosial şəbəkələrin hər biri 13 silahsız insanın qətlində məsuliyyət daşıyır".

 

 

 

Beynəlxalq Uşaq Xərçəng Xəstəlikləri ilə Mübarizə Günü ilk dəfə Uşaq Valideynlərinin Ümumdünya Konfederasiyasının təşəbbüsü ilə 2001-ci ildən təqvimə daxil edilib. Birinci dəfə həmin beynəlxalq gün yanvarın 15-də Lüksemburqda keçirilib, ancaq sonra onu fevralda qeyd etmək qərara alınıb.

Hazırda onkoloji xəstəliklərə tutulmuş uşaqlar günü Uşaq Onkoloqlarının Beynəlxalq Cəmiyyətinin himayəsi altında dünyanın 90-dan artıq ölkəsində, o cümlədən Azərbaycanda qeyd edilir.

Uşaqlarda təsadüf olunan onkoloji xəstəliklər bütün bədxassəli şişlərin 1-1,5 faizini təşkil edir, böyüklərdə rast gəlinən xəstəliklərə nisbətən çox fərqlidir və onların əsas hissəsini embrional şişlər təşkil edir. Bunların içində leykemiyalar daha tez-tez rast gəlinən xərçəng növüdür. Mərkəzi sinir sisteminin şişləri və limfomalar da uşaqlarda daha çox yayılan xəstəliklərdir. Digər bədxassəli şişlər məhz, nefroblastoma, neyrolastoma, rabdomiosarkoma isə hər biri ayrılıqda 6-7 faiz təşkil edir. Böyüklərdə təsadüf edilən mədə-bağırsaq, ağciyər, süd vəzi xərçəngi uşaqlarda çox nadir hallarda rast gəlinir.

Tibbi statistikaya əsasən hər il dünyada 20 yaşınadək olan təxminən 400 min uşağa xərçəng diaqnozu qoyulur və onlardan təxminən yarısı həyatla vidalaşır. Erkən və vaxtında aparılan diaqnostika onkoloji xəstəliklərin müalicəsində mühüm rol oynayır. Xəstəliyin birinci və ya ikinci mərhələdə aşkar edilməsi onun uğurlu müalicəsinə səbəb olur. Ancaq xərçəng xəstəliyi əksər hallarda üçüncü, 8 faiz hallarda isə hətta dördüncü mərhələdə aşkar edilir.

Çətinlik ondan ibarətdir ki, onkologiyanın təxminən 200-ə yaxın forması var və xəstəliyin hər hansı bir orqanda başlaması mümkündür. Uşaqlar tamamilə müxtəlif yaşlarda - bir aylığından 18 yaşa qədər xəstəliyə düçar ola bilirlər və onların hamısının intensiv müalicəyə ehtiyacı var. Müasir müalicə metodları uşaq onkologiyasında daha yaxşı nəticə verir və uşaqların böyük əksəriyyətində tam sağalma mümkündür.

2012-ci il martın 7-də Milli Onkologiya Mərkəzinin nəzdində Azərbaycanda ilk dəfə Uşaq Onkoloji Klinikası fəaliyyətə başlayıb. Uşaq Onkoloji Klinikasının yaradılmasında Azərbaycan Respublikasının Birinci vitse-prezidenti Mehriban Əliyevanın və Milli Onkologiya Mərkəzinin direktoru, akademik Cəmil Əliyevin böyük əməyi var. Hazırda həmin klinika regionumuzda onkoloji xəstəliklərdən əziyyət çəkən uşaqlara ixtisaslaşmış, yüksək texnologiyalarla təchiz olunmuş keyfiyyətli tibbi yardım göstərən yeganə tibb müəssisəsidir.

 

 

 

Ekologiya və Təbii Sərvətlər Nazirliyi ölkə ərazisində havanın dəyişəcəyi barədə xəbərdarlıq edib.

Nazirlikdən verilən məlumata görə, fevralın 17-də Bakıda və Abşeron yarımadasında arabir yağış yağacağı gözlənilir. Fevralın 17-si axşam və 18-də yağışın fasilələrlə sulu qara, qara keçəcəyi ehtimal olunur.

Şimal-qərb küləyi əsəcək, 15-20 m/s, arabir 23-25 m/s, fevralın 17-də axşam, 18-i gecə və səhər yarımadanın bəzi yerlərində arabir 28-30 m/s-dək güclənəcək.
Havanın temperaturu ötən günlərlə müqayisədə tədricən 5-10 dərəcə aşağı enəcək, fevralın 17-si axşam və 18-də 0 dərəcəyə yaxın olacaq.

Fevralın 17-si Azərbaycanın şimal və qərb rayonlarından başlayaraq 19-u səhərədək ölkə ərazisində hava şəraitinin dəyişəcəyi, arabir yağıntılı olacağı, qar yağacağı, əsasən dağlıq və dağətəyi rayonlarda intensiv, güclü olacağı gözlənilir. Qərb küləyi əsəcək, 15-20 m/s, ayrı-ayrı yerlərdə arabir 27-32 m/s-dək güclənəcək. Havanın temperaturu ötən günlərlə müqayisədə tədricən 5-10 dərəcə aşağı enəcək. Dağlıq və dağətəyi rayonlarda yolların buz bağlayacağı, fevralın 17-də çovğun olacağı ehtimalı var.

 

 

 

 

Azərbaycanın qısa zamanda COVİD-19-a qarşı vaksinləri ölkəyə gətirməsi çox əhəmiyyətli nailiyyətdir.

Bunu Ümumdünya Səhiyyə Təşkilatının Azərbaycandakı nümayəndəliyinin rəhbəri Hande Harmancı deyib.

Onun sözlərinə görə, pandemiyadan qurtulmaq üçün vaksinasiyanın aparılması çox vacibdir:

"Dünyada çox sayda ölkə artıq vaksinasiyaya start verib. Amma elə bu qədər də ölkə hələ peyvəndə başlamayıb. Azərbaycanı vaksinləri ölkəyə gətirməsi çox əhəmiyyətli nailiyyətdir. İnsanlar bunu başa düşür və qısa zaman ərzində vaksinasiya olunurlar".

İlk növbədə səhiyyə işçilərinin vaksinasiyadan keçməsini vacib sayan H.Harmancı qeyd edib ki, Azərbaycanda çox sayda tibb mütəxəssisi artıq peyvənd olunub. Bu da həm tibb işçilərinin, həm də pasiyentlərin təhllükəsizliyi baxımından əhəmiyyətlidir.

 

 

 

Naxçıvan Muxtar Respublikası Kənd Təsərrüfatı Nazirliyinin mütəxəssisləri Culfa rayon İcra Hakimiyyətinin əməkdaşları ilə birlikdə rayonun Ərəzin kəndində torpaq mülkiyyətçiləri və ailə təsərrüfatı başçılarının  iştirakı ilə “Torpağın münbitliyinin qorunması, üzvi və mineral gübrələrin verilməsi, yaz tarla işlərinə hazırlıq və zərərvericilərə qarşı mübarizə tədbirləri” mövzusunda tarla-seminar müşavirəsi keçirilib.

Müşavirəni giriş sözü ilə İcra Hakimiyyətinin əməkdaşı Valeh Kəngərli açaraq müşavirənin məqsədi haqqında tədbir iştirakçılarına ətraflı məlumat verib.

Kənd Təsərrüfatı Nazirliyinin mütəxəssisləri Əsgər Həsənov, Yaşar Quliyev və Bəhruz Qasımov tərəfindən Torpağın münbitliyinin qorunub saxlanması, taxılçılıqda mütərəqqi metodların, o cümlədən şırımla suvarmanın əhəmiyyəti”, “Payızlıq taxıllara mineral və üzvi gübrələrin nora və nisbətlərə uyğun qaydada, eləcə də optimal müddətdə həyata keçirilməsi” mövzularında çıxış ediblər. Çıxışlarda vurğulanıb ki, əkin dövriyyəsinə daxil olan torpaq sahələrindən səmərəli istifadə olunaraq yüksək məhsuldarlığa nail olunması üçün əkindən əvvəl torpaqların laborator analizləri aparılmalı, sturuktur tərkibi müəyyənləşdirilməlidir. Sturuktur tərkibinə əsasən qida mühiti yaradılmalı, həmin qida mühitində yaşam şəraitini qura bilən rayonlaşdırılmış məhsuldar toxum sortlarından istifadə edilərək əkin həyata keçirilməli, şırımla suvarla üsuluna xüsusi diqqət yetirilməlidir.

Ardını oxu...

Ölkəmizdə olduğu kimi, muxtar respublikada da ulu öndər Heydər Əliyevin müəyyənləşdirdiyi strateji inkişaf konsepsiyasının uğurla reallaşdırılması, yenilənən qlobal və regional perspektivlər nəzərə alınmaqla həyata keçirilən kompleks tədbirlər yeni-yeni nailiyyətlərin əldə edilməsi üçün etibarlı zəmin yaradır. Məhz bunun nəticəsidir ki, Naxçıvan Muxtar Respublikası yüksək templə inkişaf edir, formalaşmış iqtisadi baza, maliyyə resursları, insan kapitalı qarşıya qoyulan məqsədləri yerinə yetirməyə imkan verir. Qədirbilən naxçıvanlıların gərgin əməyi, yorulmaz fəaliyyəti, qurub-yaratmaq əzmi bu diyarı gülüstana çevirib. Bu mənada müasir Naxçıvanın əldə etdiyi böyük uğurla heç də təsadüfi deyil. Çünki harada güclü nizam-intizam, insana qayğı, əməyə yüksək qiymət, vətənpərvərlik, vicdan, torpağa, yurda, elə-obaya bağlılıq varsa, orada irəliləyiş, inkişaf olacaqdır. Muxtar respublika bunun real nümunəsidir. Azərbaycan Respublikasının Prezidenti İlham Əliyevin dediyi kimi: “Azərbaycanın digər bölgələri də inkişaf edir. Amma sizə deyə bilərəm ki, bu baxımdan Naxçıvan Azərbaycanda liderdir və ümid edirəm ki, siz gələcəkdə də liderliyi saxlayacaqsınız”.

Təhsilə qayğı gələcəyimizə qayğıdır

Bu gün muxtar respublikanın bütün bölgələri inkişaf edir, gündən-günə gözəlləşir. Göstərilə dövlət qayğısı nəticəsində hər ay yeni-yeni sosial obyektlər istifadəyə verilir, abadlaşan qəsəbə və kəndlərin sayı artır, şəhərlərin siması dəyişir. Şərur rayonunun Şəhriyar kəndi də hərtərəfli dövlət qayğısı ilə əhatə olunub. Kənddə geniş quruculuq işlər aparılıb, yol yenidən qurulub, ümumtəhsil və uşaq-musiqi məktəbləri üçün yeni binalar, kənd və xidmət mərkəzləri, həkim ambulatoriyası tikilib.

Yanvarın 14-də Şəhriyar kənd tam orta məktəbinin yeni binası istifadəyə verilib. Bu münasibətlə keçirilən tədbirdə iştirak edən Naxçıvan Muxtar Respublikası Ali Məclisinin Sədri Vasif Talıbov məktəbin yeni binasının istifadəyə verilməsi münasibətilə kollektivi təbrik edib. Ali Məclisin Sədri deyib: “Hər bir ölkə gələcəyini uğurlu görmək istəyir. Azərbaycan müstəqil dövlətdir, onun qurucusu ümummilli liderimiz Heydər Əliyevdir. Bu gün onun yolunun uğurla davam etdirilməsinin nəticəsidir ki, ölkəmizdə təhsilə dövlət qayğısı göstərilir. Gənclərin vətənpərvər yetişdirilməsi Azərbaycanın müstəqilliyinin davamlı, gələcəyinin etibarlı olmasına xidmət edir. İnkişafa gedən yol təhsildən keçir. Bütün sahələr üçün yaxşı mütəxəssis, vətənpərvər gənclər məktəblərdə yetişdirilir. Yaradılan şərait imkan verəcəkdir ki, burada yetişdirilən təhsilli gənclər ölkəmizin gələcək inkişafında iştirak etsinlər. Bu da kollektivin ölkəmizin inkişafına, gələcəyinə verdiyi töhfədir”.

Ali Məclisin Sədri yaradılan şəraitdən səmərəli istifadə olunacağına, təhsil ocağının muxtar respublikanın nümunəvi məktəbləri sırasında öz yerini qoruyub saxlayacağına əminliyini bildirib.

Ardını oxu...

AMEA Naxçıvan Bölməsi Bioresurslar İnstitutunun Meyvə, tərəvəz və üzüm laboratoriyasının rəhbəri, aqrar elmləri doktoru, dosent Varis Quliyevin və Azərbaycan Elmi-Tədqiqat Üzümçülük və Şərabçılıq İnstitutunun direktoru, aqrar elmləri doktoru, dosent Vüqar Səlimovun həm müəllifliyi ilə “Azərbaycan ampeloqrafiyası” monoqrafiyasının II cildi işıq üzü görüb.

2017-ci ildə nəşr edilmiş I cild “Azərbaycan ampeloqrafiyası”nın davamı olan bu fundamental kapital əsər giriş, 3 bölmə və ümumilikdə, 7 fəsildən ibarətdir. Xüsusi strukturda tərtib olunan monoqrafiyada “Ümumi ampeloqrafiya”, “Rəqəmsal ampeloqrafiya” və “Xüsusi ampeloqrafiya” adlı bölmə başlıqları altında uyğun fəsillər yer alıb.

İki fəsildən ibarət “Ümumi ampeloqrafiya” bölməsində Azərbaycanda aparılan ampeloqrafik tədqiqatlar, üzümçülüyün inkişaf strategiyası, becərilən üzüm sortlarının genefondunun tərkibi, polimorfizm xüsusiyyətləri, üzümçülüyün yenidən inkişaf etdirilməsinin elmi əsasları araşdırılır.

Monoqrafiyanın “Rəqəmsal ampeloqrafiya” bölməsində Azərbaycanda becərilən üzüm sortlarının şifrə və kodları ilə bağlı informasiya verilir.

Ardını oxu...

Tibbi Ərazi Bölmələrini İdarəetmə Birliyi (TƏBİB) koronavirusa qarşı vaksinin effektivliyi və insanda yaratdığı immunitetin müddəti ilə bağlı açıqlama verib.

 TƏBİB-dən bildirilib ki, Türkiyədə aparılan tədqiqatların nəticəsinə görə, vaksinin effektivliyi 92 faizdir.

"İnsanda yaratdığı immunitetin müddəti minimum 1 il, maksimum müddət isə hələ rəsmi təsdiqlənməyib",- məlumatda qeyd olunub.

 

 

 

Çin Kommunist Partiyası Mərkəzi Komitəsi tərəfindən Yeni Azərbaycan Partiyasına (YAP) 10 min doza vaksin verilməsi barədə qərar qəbul edilib.

YAP-dan verilən məlumata görə, bu haqda Çin Kommunist Partiyası Mərkəzi Komitəsinin xarici əlaqələr idarəsinin şöbə müdiri Can Cenkun bildirib. ÇKP MK-nın nümayəndəsi qeyd etmişdir ki, vaksinlər Yeni Azərbaycan Partiyasına yardım məqsədilə, təmənnasız veriləcəkdir və ehtiyac olduğu təqdirdə dozanın miqdarı artırıla bilər.

Qeyd edək ki, Yeni Azərbaycan Partiyası ilə Çin Kommunist Partiyası arasında 20 ildən artıq davam edən sıx qarşılıqlı əməkdaşlıq münasibətləri mövcuddur. Azərbaycan ilə Çin arasında təməli Ulu Öndər Heydər Əliyev tərəfindən qoyulmuş dostluq və əməkdaşlıq münasibətləri ötən illər ərzində böyük inkişaf yolu keçmişdir. Azərbaycanın strateji tərəfdaşı kimi qəbul edilən Çin Xalq Respublikası ölkəmizin ərazi bütövlüyü prinsipini hər zaman bütün səviyyələrdə müdafiə edib. Ölkələrimiz arasında strateji tərəfdaşlıq münasibətləri Yeni Azərbaycan Partiyası ilə Çin Kommunist Partiyası arasında da əlaqələrin yaranmasına və dinamik inkişafına münbit şərait yaradıb.

 

 

 

 

 

 

 

 

Təhsil naziri təyin ediləndən təhsil sahəsində həyata keçirmək istədiyim proseslər yaxşı gedir. Biz bir neçə istiqamətdə yeniliklər etməyə çalışırıq.

Bunu təhsil naziri Emin Əmrullayev “Real TV”yə müsahibəsində deyib.

Onun sözlərinə görə, ölkə başçısının qarşıya qoyduğu məqsədlərə uyğun olaraq, ilk növbədə yeni ixtisaslar məsələsi gündəmdədir: “Biz növbəti ildən ali təhsil müəssisələrindəki “Sabah” qruplarında magistratura səviyyəsində yeni ixtisaslar-kibertəhlükəsizlik, informasiya texnologiyaları, kompüter elmləri, şəhərsalma və planlaşdırma-ümumilikdə 7 müxtəlif ixtisaslar üzrə təhsil vermək istəyirik”.

Nazir qeyd edib ki, başqa bir istiqamət peşə təhsili ilə bağlıdır. Peşə təhsilinin həm nüfuzunun qaldırılmasına, həm də peşə təhsilinin insanlarımız üçün nə qədər faydalı olması, qısamüddətli peşə kurslarının fəaliyyəti və yüksək peşə təhsili üzrə kadrların hazırlanması istiqamətində işlər davam etdirilir.

Ardını oxu...


Keçən il dünya və Azərbaycan iqtisadiyyatı üçün çox ağır il oldu, ölkəmiz 4,3 faiz gerilədi. Hətta daha çox tənəzzül edəcəyimiz gözlənilirdi, amma buna bir neçə amil imkan vermədi. Birincisi, prezident İlham Əliyev başda olmaqla hökumətin pandemiyanın təsirinin minimuma endirilməsi və həm insanların sağlamlığını mümkün səviyyədə qorumaq, həm də iqtisadiyyatın təhlükəsizliyi təmin etmək baxımından çox böyük hazırlıq nümayiş etdirməsi, ikincisi isə xarici təsirlərin də sonradan yumşalması.

Ancaq bir cəhəti xatırladım: keçən ilin sentyabrında yazmışdım ki, Naxçıvan Muxtar Respublikasında tənəzzül yoxdur, əksinə, səkkiz ayda 0,7 faiz çox ÜDM istehsal edilib. Qeyd olunan ilin yanvar-avqust ayları ərzində Muxtar Respublikada 1 milyard 840 milyon 976 min manat həcmində ÜDM istehsal edilmişdi ki, bu rəqəm 2019-cu ilin eyni dövrü ilə müqayisədə 0,7 faiz çox idi. Yəni pandemiya Naxçıvan iqtisadiyyatını buxovlaya bilməmişdi.

Ardını oxu...

Naxçıvanın “Dəmirqapı Dərbəndi”, qeyrət qalası Sədərək torpağı və onu üç tərəfdən dövrəyə alan, vüqarını Vətən oğullarının bir vaxtlar döyüşlərdə bu torpağa hopan qanından, sevgisindən alan bu dağlar nələrə şahidlik etməyib. Bir vaxtlar – nə çox, nə az, düz 30 il bundan öncə Sədərək od içində idi, onun bahar çiçəkləri şəhid qanına boyanırdı. Erməni daşnakları Naxçıvanı hədəf seçmişdilər. Onlar səhərə kimi dinc Sədərəyi güclü atəşə tuturdular. 12 min əhalinin yaşadığı kəndin hər səhəri döyüşlə açılırdı. Lakin igid oğullarımız mərdlik göstərərək düşmənin iradəsini qırmağa nail oldular. 

Ardını oxu...

Naxçıvanın muxtariyyət modeli


Muxtariyyət sözünün mahiyyətində fərqlilik əks olunub. Dövlətlərarası münasibətlərdə isə muxtariyyət çox vaxt özünü milli-etnik, linqvistik, dini, coğrafi və digər fərqliliklərin və ya azlıqların hüquqlarının xüsusi olaraq qorunması müstəvisində göstərir. Tarixin qədim dövrlərindən etibarən beynəlxalq münasibətlər sistemində muxtariyyət statusuna malik dövlət quruluşları mövcud olmuşdur. Belə ki, hələ eramızdan əvvəl yunan şəhər dövlətləri muxtariyyət hüququna malik olmuşlar. Yunanıstanın əsas ərazisindən – Balkan yarımadasından kənarda Kiçik Asiyada, Qara dəniz sahillərində yaranmış yunan şəhər dövlətləri – polislər, məhz muxtar idarəetmə sayəsində əsas ərazidən uzaqda olsa belə, öz mövcudiyyətlərini uzun müddət davam etdirə bilmişlər.

Ardını oxu...

2021-ci il oktyabrın 13-də mühüm tarixi-siyasi əhəmiyyətə malik Qars müqaviləsinin imzalanmasının 100 illiyi tamam olur. Bununla əlaqədar Naxçıvan Muxtar Respublikası Ali Məclisinin Sədri cənab Vasif Talıbov fevralın 8-də “Qars müqaviləsinin 100 illiyinin keçirilməsi haqqında” Sərəncam imzalayıb. Sərəncama əsasən Tədbirlər Planı da təsdiq olunub.
Tədbirlər Planında bir sıra tədbirlərin keçirilməsi nəzərdə tutulmuşdur. Belə ki, “Qars müqaviləsi və Naxçıvan” mövzusunda konfransın, Qars şəhərində Türkiyənin Qars Qafqaz Universiteti ilə birlikdə beynəlxalq konfransın keçirilməsi, Qars müqaviləsi ilə təsbit olunmuş ərazinin xəritəsinin hazırlanması, “Qars müqaviləsi – 100” mövzusunda interaktiv dərsin keçilməsi, “Naxçıvan” jurnalının bir nömrəsinin Qars müqaviləsinin 100 illiyinə həsr edilməsi, zərf və poçt markalarının buraxılması, “Qars müqaviləsi və Naxçıvan” mövzusunda elmi araşdırmaların aparılması, elmi əsərlərdən ibarət sərginin təşkili, yubiley tədbirinin keçirilməsi və başqa tədbirlər nəzərdə tutulmuşdur.

Ardını oxu...

İki küçənin ayrıcında dayanmışam. Qış ayı olsa da, səmada günəşin hərtərəfli şüaları küçəni bir qədər isidib. Hərarətli günəş qüruba doğru əyildikcə sanki küçəni bir qədər işıqlandırır. Elə bil dar döngələrin tarixinə işıq tutaraq, onları da diqqətlə izləməyə çağırır. Elə bu işığın fonunda, önündə dayandığım məhəllənin dünəni aydın görünür.  Divarlarda günəş şüaları əks olunduqca onların arxasında yatan tarix dil açıb danışır. Burada yaşayan haylı-küylü günlər, insanlar, ömürlər...Elə bil qulağıma səs gəlir. 2 əsrlik yaşı olan məhəllənin insanlarının addım səsləri...Hər addım da bir tarix danışır. Bu addımlarda acılı-şirinli xatirələrə sığınan yaddaqlan ömür yollarının illəri var. Gəzdikcə ayaqlarımla toxunduğum tozların, çınqılların qəlibləşən 2 əsrlik addım izləri, saymaqla bitməyən o illərin mənə yaşatdığı duyğuları dərindən hiss edirəm... Saysız-hesabsız insanlara qucaq açıb onları yaşadan, böyüdən, daşlaşan tarixin tarixi yaddaşlarına şahidlik edən elə Sarvanlar məhəlləsinin girişində, məhəllə haqqında araşdırdığım və öyrəndiklərimi diqqətinizə çatdırıram: Başlayaq, 1980-ci ildə “Mədəni maarif” jurnalında dərc olunan, filologiya elmləri namizədi Əli Əliyevin “Naxçıvan şəhərində məhəllə adları” başlıqlı məqalədə Sarvanlar məhəlləsi haqqında yazılanlarla. Jurnalda yazılır: “Sarvanlar məhəlləsi ilk sakinlərinin-sarvanlar qəbiləsinin etnik adını daşıyır. Qərbi Azərbaycanın Zəngibasar bölgəsində Sarvanlar kəndi və Sarvanlar elinin adı ilə bağlıdır. Sarvanlar lap qədimdən dəvəçiliklə məşğul olduğundan onlara sarvanlar deyiblər. Naxçıvan şəhərindəki “Dəvə yatağı” adlı yer də bu fikri təsdiq edir. Naxçıvana basqın zamanı qənimətlərlə yanaşı çoxlu dəvə karvanları da ələ keçirmişlər. Həmçinin “Kitabi-Dədə Qorqud” dastanında təsvir edilən oğuz ellərində qatar-qatar dəvələr ən yaxşı var-dövlət sayılırmış”. Naxçıvan ensiklopediyasından isə öyrənirik ki, məhəllə şimaldan Sallaqxana, cənubdan Gomayıl məhəllələri ilə qonşu olub. Şəxsi təsərrüfat sahələrində tut, ərik, qoz ağacları və nar kolları becərmişlər. Məhəllənin adı haqqında arxiv materiallarının 1831-ci ilə aid kamerial siyahısında da vuğulanır ki, şəhər ta qədimdən 4 əsas hissəyə bölünür. Sarvanlar, Şahab, Əlixan, Qurdlar. Güman ki, adıçəkilən bu tayfa daha çox dəvəçiliklə məşğul olduğu üçün sarvanlar adlandırılıb. XX əsrin arxiv məlumatlarından o da aydın olur ki, daha çox dəvəçilik, arabaçılıq, faytonçuluqla məşğul olublar burada yaşayan sarvanlılar.

Ardını oxu...

Muzey əməkdaşları üçün “Daxil olan eksponatların əsas və elmi-köməkçi fonda işlənməsi qaydaları”mövzusunda seminar-treninq keçirilmişdir.

Naxçıvan Muxtar Respublikası Mədəniyyət Nazirliyinin təşkilatçılığı ilə keçirilən seminar-treninqi nazirliyin şöbə müdiri G.Babayeva giriş sözü ilə açmış, “Xan Sarayı” Dövlət Tarix-Memarlıq, Möminə Xatın və Açıq Səma Altında Muzey Kompleksinin baş fond mühafizi-elmi işçisi Z.Əliyeva “Daxil olan eksponatların  əsas və elmi-köməkçi fonda işlənməsi” mövzusunda çıxış etmişdir. Qeyd olunmuşdur ki, Nazirliyin sistemində 1 rəsm qalereyası və 29 müxtəlif profilli muzey fəaliyyət göstərir ki, bu mədəniyyət ocaqlarında xalqımızın tarixini, həyat tərzini, adət-ənənələrini özündə əks etdirən maddi-mədəniyyət nümunələri mühafizə olunaraq qorunub saxlanılır.

Ardını oxu...

Azərbaycan Respublikasında koronavirus (COVID-19) infeksiyasına 191 yeni yoluxma faktı qeydə alınıb, 226 nəfər müalicə olunaraq sağalıb.

Nazirlər Kabineti yanında Operativ Qərargahdan  verilən məlumata görə, COVID-19 üçün götürülən analiz nümunələri müsbət çıxmış 3 nəfər vəfat edib.

İndiyədək ölkədə ümumilikdə 231 840 nəfərin koronavirus infeksiyasına yoluxması faktı müəyyən edilib, onlardan 226 345 nəfər müalicə olunaraq sağalıb, 3 173 nəfər vəfat edib, aktiv xəstə sayı 2 322 nəfərdir.

Son sutka ərzində yeni yoluxma hallarının müəyyənləşdirilməsi ilə əlaqədar 7 260, ötən müddət ərzində isə ümumilikdə 2 485 483 test aparılıb.

 

 

 

 

            Naxçıvan Muxtar Respublikasının Televiziya və Radio Şurası 2021-ci ilin yanvar ayında teleradioların fəaliyyətini izləmiş, Naxçıvan Muxtar Respublikası Ali Məclisi Sədrinin fərman və sərəncamlarından, təsdiq olunmuş Dövlət proqramları və Tədbirlər planlarından irəli gələn vəzifələrin muxtar respublikada fəaliyyət göstərən teleradiolarda icrasını diqqətdə saxlamışdır.

          Şura yanvar ayında teleradiolarda texniki və yaradıcılıq baxımından keyfiyyətin yüksəldilməsinə xüsusi diqqət göstərməklə yanaşı, həm də teleradioların monitorinqini aparmışdır. Yanvar ayının 13-də şura tərəfindən “Kanal 35” televiziyası və “Naxçıvanın səsi” radiosunda monitorinq müzakirləri keçirilmişdir.

          Aparılan monitorinqlərin nəticələri göstərir ki, 2021-ci ilin yanvar ayında Naxçıvan Dövlət Televiziyasının öz teleməhsulları efirin 72 faizini əhatə etmişdir.

          Əvvəlki aylarda olduğu kimi, yanvar ayında da vətənpərvərlik mövzusu diqqət mərkəzində olmuş, bununla yanaşı, televiziyada digər mövzulara da müraciət edilmişdir.

          Şura Naxçıvan Dövlət Radiosunun efirini mütəmadi olaraq izləmiş, radioda fəaliyyət göstərən ədəbi-bədii və ictimai-siyasi redaksiyaların fəaliyyətini müqayisəli şəkildə təhlil etmişdir.  Radio yanvar ayı ərzində 611 saat efirdə olmuşdur. Ümumi efirin 46 faizini radionun öz istehsalı olan verilişlər təşkil etmişdir.

Ardını oxu...

Muxtar respublikada yaşayan bütün uşaqlar, o cümlədən sağlamlıq imkanları məhdud uşaqlar hər zaman dövlət qayğısı ilə əhatə olunmuş, onların hərtərəfli inkişafı, cəmiyyətə adaptasiyası və inteqrasiyası, təhsil hüquqlarının təmin olunması diqqət mərkəzində saxlanılmışdır. Sağlamlıq imkanları məhdud uşaqların layiqli vətəndaş kimi formalaşması, cəmiyyətə inteqrasiya olunması, təhsilə cəlbinin davamlılığının təmin olunması məqsədilə müvafiq tədbirlər həyata keçirilir. Bu kateqoriyadan olan uşaqların təlim-tərbiyəsi, onların hüquqlarının müdafiə olunması, asudə vaxtlarının səmərəli təşkili, dünyagörüşlərinin formalaşması, eləcə də müxtəlif sahələrdə bilik və bacarıqlarının təkmilləşdirilməsi istiqamətində bir sıra işlər görülmüş, muzeylərə, tarixi abidələrə virtual gəzintiləri, həmçinin məktəbdənkənar tərbiyə müəssisələrinin dərnəklərinə onlayn ekskursiyaları təşkil olunmuşdur.

Belə tədbirlərdən biri də fevralın 11-dən başlayaraq 4 gün ərzində sağlamlıq imkanları məhdud olan 15 uşağın Heydər Əliyev Uşaq-Gənclər Yaradıcılıq Mərkəzinin Ebru sənəti dərnəyinə təşkil edilən kurslardır. Naxçıvan Muxtar Respublikası Təhsil Nazirliyinin təşkilatçılığı ilə keçirilən məşğələdə uşaqlara dərnəyin fəaliyyəti barədə ətraflı məlumat verilib. Bildirilib ki, təhsilə göstərilən dövlət qayğısının nəticəsidir ki, ümumtəhsil müəssisələri ilə yanaşı məktəbdənkənar tərbiyə müəssisələrində uşaqların asudə vaxtlarının səmərəli təşkili, onların istedad və bacarıqlarının üzə çıxarılması, yaradıcılıq qabiliyyətlərinin genişləndirilməsi üçün zəruri şərait yaradılmışdır. Naxçıvan Muxtar Respublikası Ali Məclisi Sədrinin tapşırığı ilə 2019-cu ildən Heydər Əliyev Uşaq-Gənclər Yaradıcılıq Mərkəzində yaradılan yeni innovativ dərnəklər sırasında Ebru sənəti dərnəyi də fəaliyyət göstərir ki, həmin dərnək də zəruri avadanlıqlarla təchiz edilib.

Ardını oxu...

Ermənistanda itkin düşən hərbçilərin yaxınları İrəvanın Respublika meydanı yanındakı əsas prospekti bağlayıblar.   Erməni KİV-lərinə istinadla xəbər veririk ki, baş nazir aparatının rəhbəri Arsen Torosyanın açıqlaması etirazçıları daha da qəzəbləndirib.

Torosyan valideynlərə deyib ki, onlar 5 əsirin geri qaytarılmasına görə hökumətə minnətdar olmalıdırlar. Bundan sonra aksiya iştirakçıları əsas prospekti bağlayıblar, nəticədə gərginlik yaranıb.

Paytaxtın mərkəzi hissəsində nəqliyyat tamamilə iflic vəziyyətə düşüb.

 

 

 

“Naxçıvan” Universitetinin əməkdaşları Fransanın Paytaxtı Paris şəhərində keçirilən   “Paris-V sosial elmlər” onlayn  konfransında iştirak ediblər.
10  ölkənin elm adamlarının iştirak etdiyi beynəlxalq konfransda “Naxçıvan” Universitetini universitetin əməkdaşları Nübar Səfərli və Emelya Süleymanova təmsil edib.
Onlayn konfransda  Nübar Səfərli  ““Naxçıvan”Universitetinin regionda mütəxəssis hazırlanmasında yeri və rolu” , Emelya Süleymanova “Müəllimin dərs zamanı şagirdlərin diqqətinin, iradəsinin və təfəkkürünün inkişaf etdirmək təcrübəsi” adlı məqalələrlə çıxış ediblər.
Konfransın sonunda hər iki məruzəçi  sertifikatla mükafatlandırılıb.
 
Seyfur Hacımuradov
 

 

Şuşa qalasının bərpa işlərinə başlanılıb.

Qala divarlarının bərpası Dövlət Şəhərsalma və Arxitektura Komitəsinin tapşırığı əsasında həyata keçirilir. Bərpa prosesinə 22 mütəxəssis cəlb olunub.

İlkin mərhələdə görülən işlərin gələn ayın sonlarına yekunlaşacağı gözlənilir. İşlər yekunlaşdıqdan sonra növbəti mərhələdə daha geniş bərpaya başlanılacaq.

Qeyd edək ki, Qarabağ xanı Pənahəli xan 1750-ci ildə Şuşa qalasının bərpa edilməsi haqqında qərar verir və Qarabağ xanlığı mərkəzi bura köçürülür. Qala bərpadan sonra uzun müddət mənbələrdə Pənahabad adlandırılır.

Şuşa qalası Azərbaycan memarlığının ən gözəl incilərindən biridir. Qala Arran memarlıq məktəbi üslubunda inşa edilib. Qalanın tikilməsində əsasən yerli daşlardan və əhəng-yumurta sarısı qarışığından istifadə edilib. Qalanın üç qapısı var. Onlardan Gəncə qapısı öz yüksək memarlıq xüsusiyyətləri ilə seçilir. Qala dairəvi mühafizə bürclərinə malikdir.

Naxçıvan Muxtar Respublikası Nazirlər Kabineti bir sıra qərarlar qəbul edib. Belə ki, “Naxçıvan Muxtar Respublikasında ictimai işlər növündə cəza çəkən və ya ictimai işlər növündə inzibati tənbeh olunmuş şəxslərin elektron nəzarət vasitəsindən istifadə Qaydası” təsdiq edilmişdir. Naxçıvan Muxtar Respublikası Əmək və Əhalinin Sosial Müdafiəsi Nazirliyinin Dövlət Məşğulluq Agentliyinin, həmçinin Naxçıvan Muxtar Respublikası Əmək və Əhalinin Sosial Müdafiəsi Nazirliyinin Dövlət Tibbi-Sosial Ekspertiza və Reabilitasiya Agentliyinin işçilərinin maddi təminatı və sosial müdafiəsinin gücləndirilməsinə dair qaydaların təsdiq edilməsi haqqında qərarlar qəbul olunmuşdur. Bundan başqa, Naxçıvan Muxtar Respublikası Nazirlər Kabinetinin 2021-ci il 5 fevral tarixli Qərarı ilə “Naxçıvan Muxtar Respublikasının prokurorluq orqanlarında xidmət yerinin dəyişdirilməsi ilə əlaqədar yaşayış yeri olmayan və bu səbəbdən kirayə götürülmüş mənzildə yaşayan prokurorluq işçilərinə pul kompensasiyasının məbləği və verilməsi Qaydası”nda dəyişiklik olunmuşdur. Dəyişikliyə əsasən prokurorluq işçisinə onun hər bir ailə üzvünə görə qulluq keçdiyi dövrdə müvəqqəti mənzilin kirayəsi üçün ödənilən müvafiq kompensasiyaların 50 faizi məbləğində əlavə pul kompensasiyası ödənilir.

Ardını oxu...

Nəqşicahan – Azərbaycanın Şərqə açılan qapısı, müasirliklə qədimliyin vəhdətində böyüdükcə gözəlləşən diyar... 9 fevral 1924-cü ildə muxtariyyət verilən Naxçıvan inkişafının intibah dövrünü yaşayır. Tarixi İpək Yolunun üzərində yerləşən, xalqımıza məxsus milli-mənəvi, zəngin təbii sərvətləri ilə məşhur olan, ilk yaşayış məskənlərindən sayılan Naxçıvan tarixi şəxsiyyətləri, elm xadimləri, sənətkarları ilə də tanınır. Bu torpağın yetirməsi, dünya siyasətçiləri arasında müdrikliyi, uzaqgörənliyi ilə seçilən ümummilli lider Heydər Əliyevin vurğuladığı kimi, Azərbaycanın qədim, zəngin tarixə, mədəniyyətə və çoxəsrlik dövlətçilik ənənələrinə malik olan Naxçıvan diyarı mürəkkəb və çətin inkişaf yolu keçmişdir: “Orta əsrlərdə Şərqin iri elm, mədəniyyət, ticarət və sənətkarlıq mərkəzlərindən biri kimi şöhrət qazanmış Naxçıvan dünya sivilizasiyasına dəyərli töhfələr vermişdir. Naxçıvanlıların öz fədakarlığı, işgüzarlığı hesabına Naxçıvan yaşayır, inkişaf edir, Naxçıvanda quruculuq prosesləri gedir”. 

Ardını oxu...

Fevralın 11-də Naxçıvan Dövlət Universitetində Web of Science, Scopus və sahə indeksli bazalarda yer alan jurnallarda fəal iştirak edən müəllim heyəti ilə görüş keçirilib.
Tədbiri giriş sözü ilə açan universitetin rektoru, dosent Elbrus İsayev qeyd edib ki, ali təhsil ocağının dünya universitetləri ilə rəqabət imkanını təmin edə biləcək maddi-texniki bazası mövcuddur. 2020-ci ildə universitetin professor-müəllim heyətindən 55 əməkdaşın 67 elmi məqaləsi beynəlxalq elm bazalarında nəşr olunub. Bu elmi məqalələrin 12-i Web of Science, 7-i Scopus, 14-ü isə sahə indekslidir. Bu da onu göstərir ki, universitet əməkdaşları onlar üçün yaradılan əlverişli mühitdən bəhrələnib. Rektor bildirib ki, əməkdaşların nüfuzlu jurnallarda dərc etdirdiyi məqalələr ingilis, rus və türk dillərində olub. Bu məqalələr Rusiya, İsveçrə, Hindistan, Bolqarıstan, İngiltərə, Türkiyə, Ukrayna, Estoniya, Tailand, Çin, Polşa, Xorvatiya və Azərbaycan mərkəzli jurnallarda nəşr edilib.

Ardını oxu...

Muxtar respublika gömrük orqanlarının əməkdaşları üçün “Avtonəqliyyat vasitələri üzərində gömrük baxışının aparılması” mövzusunda təlimlərə start verilib. Naxçıvan gömrük sistemində təkmilləşmə və ixtisaslaşma proqramı çərçivəsində təşkil olunan təlimlərə nəqliyyat vasitələri üzərində aparılan gömrük baxışının səmərəliliyini artırmaq məqsədilə Sədərək, Culfa, Şahtaxtı və Naxçıvan Şəhər Gömrük idarələrində yaradılmış müayinə qruplarında yer alan əməkdaşlar cəlb edilib.

Ardını oxu...

“Bu təlimlərin icrası zamanı bütün dünya gördü ki, Türkiyə və Azərbaycanın Silahlı Qüvvələri malik olduqları təchizat ilə quruda, dənizdə, havada, qışda, yazda, dağda, düzənlikdə ona verilən bütün tapşırıqları yerinə yetirə biləcək gücdədir. Hər kəs türk millətinin müdafiəsi məsələsində Türkiyə və Azərbaycan Silahlı Qüvvələrinə güvənməlidir”.

Bunu Türkiyənin milli müdafiə naziri Hulusi Akar söyləyib.

O, Türkiyə və Azərbaycanın qardaş ölkələr olduğunu bir daha vurğulayıb: “44 günlük müharibə bunun sadəcə sözdə yox, əməldə də olduğunu göstərdi”.

“Sultan Alparslandan Qazi Mustafa Kamala qədər min ildən çox bizə Vətən olan bu torpaqları bu günlərə, bu səviyyələrə çatdıran bütün sərkərdələrimizin xatirəsini ehtiramla anıram. Başda 106 il öncə Şərq cəbhəsində bu torpaqlarda canını fəda edən azərbaycanlı qardaşlarımız olmaqla bütün şəhidlərimizə Allahdan rəhmət diləyirəm”, - nazir bildirib.

 

 

 

Türkiyə Prezidenti Rəcəb Tayyib Ərdoğan “Azərbaycan Respublikası Hökuməti ilə Türkiyə Respublikası Hökuməti arasında Mədəniyyət mərkəzlərinin təsis olunması, iş mexanizmi və fəaliyyətləri haqqında Saziş”i təsdiq edib.

Bu barədə Türkiyənin “Resmi Gazete”sində məlumat verilib.

Saziş 2018-ci il aprelin 25-də Ankarada imzalanıb.

 

 

 

 

Azərbaycan Hərbi Dəniz Qüvvələrinin zabitləri Pakistan İslam Respublikasının Kəraçi şəhərində və Ərəb Dənizi sektorunda keçirilən “AMAN-21” çoxmillətli Hərbi Dəniz Qüvvələri təlimində müşahidəçi qismində iştirak edirlər.

Müdafiə Nazirliyindən verilən məlumata görə, 30-dan çox ölkənin Hərbi Dəniz Qüvvələrinin iştirakı ilə keçirilən təlimlər fevralın 16-dək davam edəcək.

 

 

 

Azərbaycan Respublikasının Minatəmizləmə Agentliyi (ANAMA) tərəfindən mina və partlamamış hərbi sursatların təmizlənməsi əməliyyatları Ağdam, Füzuli, Cəbrayıl, Zəngilan, Qubadlı, Tərtər rayonları və Şuşa şəhəri ərazisində aparılır.

Agentlikdən verilən məlumata görə, Bərdə-Ağdam, Füzuli-Zəngilan-Ağbənd dəmiryolu xətləri, Füzuli-Şuşa, Suqovuşan-Talış-Tapqaraqoyunlu istiqamətində avtomobil yollarının keçəcəyi ərazilər, Füzuli-Şuşa, Ağdam və Tərtər rayonunun Suqovuşan kəndinə çəkiləcək yüksək gərginlikli elektrik xəttinin keçəcəyi ərazinin, Qubadlı, Ağdam və Zəngilan rayonları ərazisində əkin sahələrinin mina və partlamamış hərbi sursatlardan (PHS) təmizlənməsi əməliyyatları davam edir.

Mina və partlamamış hərbi sursatların təmizlənməsi əməliyyatları əllə minaaxtarma, mexaniki minatəmizləmə maşınlarının və minaaxtaran itlərin dəstəyi ilə həyata keçirilir.

Ardını oxu...

ARXİV

Aprel 2021
Be Ça Ç Ca C Ş B
29 30 31 1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30 1 2

MÜƏLLİFLƏR

KEÇİDLƏR