22 Sentyabr 2019, Bazar

Naxçıvan Muxtar Respublikası Fövqəladə Hallar Nazirliyinin təşkilatçılığı ilə Ordubad rayon ümumtəhsil məktəblərinin ikinci, beşinci və altıncı siniflərinin rəhbərləri ilə tədris-metodik toplantı keçirilib.
Ordubad Rayon Mədəniyyət Evində keçirilən tədbirdə əsas məqsəd yeni tədris ilinə hazırlıqla bağlı ümumtəhsil məktəblərində tədris olunan mülki müdafiə dərslərinin keyfiyyətini yaxşılaşdırmaq, müəllimlərin bu sahə üzrə pedaqoji səviyyələrini artırmaqdan ibarətdir.
Tədbirdə Fövqəladə Hallar Nazirliyinin Mülki müdafiə işinin təşkili şöbəsinin rəisi, polkovnik Emin Qasımov çıxış edərək bildirib ki, təsdiq olunmuş tədris proqramı əsasında ümumtəhsil məktəblərinin ikinci siniflərində mülki müdafiə dərsləri 6 saat, 5-ci və 6-cı siniflərdə isə 8 saat həcmində keçilir. Mülki müdafiə fənni 2-ci və 5-ci siniflərdə tədris ilinin ikinci, 6-cı siniflərdə isə birinci yarım ilində tədris olunur.
Vurğulanıb ki, mülki müdafiə dərslərinin keçilməsinin xüsusiyyəti öyrədilən materialın praktik təmayülə malik olmasıdır. Dərslər zamanı şagirdlərin fərdi xarakterləri nəzərə alınmaqla onlarda mülki müdafiə fənninə maraq artırmaq mümkündür. Bu məqsədlə Mülki müdafiə işinin təşkili şöbəsi tərəfindən müvafiq təlimatlar hazır­lanıb, əyani vəsaitlər, slaydlar və videomateriallar məktəblərə təqdim olunub.
Sonra bir sıra mövzularda mühazirələr dinlənilib, müəllimləri maraqlandıran suallar ­cavablandırılıb.

Xəbərlər şöbəsi

2018-ci il dekabrın 10-da Naxçıvan Muxtar Respublikası Ali Məclisində “Naxçıvan Muxtar Respublikasında bədən tərbiyəsi və idmanın ­hazırkı vəziyyəti və qarşıda duran vəzifələr haqqında” keçirilən müşavirədə verilən tapşırıq və tövsiyələrə əsasən muxtar respublikada digər idman növləri kimi, şahmatın da inkişafı, uşaq və yeniyetmələr arasında kütləvi hal alması üçün mühüm tədbirlər həyata keçirilir.
Muxtar respublikada şahmatın tədrisinin keyfiyyətinin yaxşılaşdırılması və müəllimlərin peşəkarlıq səviyyəsinin yoxlanılması məqsədilə dünən şahmat fənnini tədris edən müəllimlərin sertifikasiyası üzrə test imtahanı keçirilib.
Naxçıvan Muxtar Respublikası Ali Məclisinin Sədri yanında Dövlət Qulluğu Məsələləri üzrə Komissiyanın Test mərkəzində keçirilən imtahanda iştirak etmək üçün 95 müəllim qeydiyyatdan keçib. Onlardan 93-ü test imtahanında iştirak edib və 83-ü müvafiq keçid balını toplayıb.
Test imtahanında iştirakçılara 40 sual təqdim edilib, sualları cavablandırmaq üçün isə 60 dəqiqə vaxt verilib. İmtahanda test tapşırıqlarının ən azı 50 faizini (20 bal) düzgün cavablandırmış şəxslər müvafiq keçid balını toplamış hesab olunurlar. Şahmat fənni üzrə aparılan test imtahanı elektron proqram təminatı vasitəsilə keçirilib. Bununla da test suallarını cavablandırarkən iştirakçılar seçdikləri cavabları imtahan vaxtı ərzində dəyişə və monitorda imtahanın vaxtını izləyə biliblər. Obyektivliyin və şəffaflığın tam təmin edilməsi məqsədilə imtahanın videoçəkilişi də aparılıb. Test imtahanı bitdikdən dərhal sonra iştirakçılara nəticələrə dair arayış təqdim edilib. Həmin nəticələr komissiyanın rəsmi internet portalında (www.dqmk.nmr.az) yerləşdirilib.

Naxçıvan Muxtar Respublikası Ali Məclisinin Sədri yanında
Dövlət Qulluğu Məsələləri üzrə Komissiyanın mətbuat xidməti

AMEA Naxçıvan Bölməsində Naxçıvan Muxtar Respublikası Ali Məclisinin Sədri cənab Vasif Talıbovun 2018-ci il 24 sen­tyabr tarixli Sərəncamı ilə “Naxçıvan Muxtar Respublikasına xidmətlərə görə” nişanı ilə təltif olunan Azərbaycan və Fransa beynəlxalq arxeoloji ekspedisiya layihəsinin rəhbəri Katherine Marroya nişanın təqdimetmə mərasimi keçirilib.
Bölmənin sədri, akademik İsmayıl ­Hacıyev tədbirdə çıxış edərək ölkəmizdə tarixi abidələrimizin, maddi mədəni irsimizin qorunması, tədqiqi və təbliği istiqamətində həyata keçirilən işlərdən danışıb. Bu sahədə ümummilli lider Heydər Əliyevin tarixi xidmətlərini diqqətə çatdıran akademik müvafiq sərəncamlara əsasən yaradılan tarixi qoruqlardan, maddi mədəni irsimizin tədqiqi üçün ayrılan maliyyə vəsaitindən, abidələrin mühafizəsi və elmi araşdırmalar üçün mövcud imkanlardan danışıb. Vurğulayıb ki, tarixi abidələrimizin mühafizəsi və onların elmi araşdırmalara cəlb edilməsi dövlətimizin bu gün diqqət mərkəzində saxladığı məsələlərdəndir.
“Xalqımızın qədim dünyagörüşünün, mədəniyyətinin göstəricisi olan maddi mədəni abidələrimizə qayğı Naxçıvanda da uğurla davam etdirilir və Naxçıvan Muxtar Respublikası Ali Məclisi Sədrinin birbaşa nəzarətindədir”, – deyən İsmayıl Hacıyev muxtar respublikada bu istiqamətdə həyata keçirilən genişmiqyaslı tədbirləri diqqətə çatdırıb.
Bildirib ki, bölmənin Tarix, Etnoqrafiya və Arxeologiya İnstitutunun əməkdaşları 2006-cı ildən xarici ölkələrdən olan həmkar­ları ilə birgə Naxçıvan tarixinin müxtəlif dövr və problemlərinə dair tədqiqatlar aparırlar. Arxeoloq alimlər tarixi dəlillərə söykənərək yekdilliklə Naxçıvan ərazisinin bəşər sivilizаsiyаsının ən qədim mərkəzlərindən və ilkin şəhər mədəniyyətinin təşəkkül tapdığı yerlərdən biri olduğunu bildirirlər. Onların fikirlərinə görə, tarixi yaşayış məskəni kimi daha qədim olan Naxçıvan şəhər kimi 5 min il bundan əvvəl formalaşıb.

Ardını oxu...

Naxçıvan Muxtar Respublikası Ali Məclisi Sədrinin “Naxçıvan Muxtar Respublikasında ailə təsərrüfatlarının inkişafı ilə bağlı” 2019-cu il 18 yanvar tarixli Sərəncamı ilə təsdiq olunmuş Tədbirlər Planına uyğun olaraq Culfa rayonunun Ərəfsə kəndində rayonda fəaliyyət göstərən ailə təsərrüfatı sahiblərinin iştirakı ilə seminar-müşavirə keçirilib.
Naxçıvan Muxtar Respublikası Kənd Təsərrüfatı və İqtisadiyyat nazirliklərinin, Daşınmaz Əmlak və Torpaq Məsələləri üzrə Dövlət Komitəsinin, Antiinhisar və İstehlak Bazarına Nəzarət Dövlət Agentliyinin, AMEA Naxçıvan Bölməsi Bioresurslar İnstitutunun və Culfa Rayon İcra Hakimiyyətinin birgə təşkilatçılığı ilə keçirilən tədbiri giriş sözü ilə İcra Hakimiyyəti aparatının aparıcı məsləhətçisi Rauf Kazımov açıb. O bildirib ki, 2019-cu ilin muxtar respublikamızda “Ailə təsərrüfatları ili” elan olunması bu sahənin inkişafına dövlət qayğısının növbəti təzahürüdür. Culfa rayonunda da ailə təsərrüfatlarının fəaliyyətlərinin genişləndirilməsi istiqamətində ardıcıl tədbirlər görülür. Göstərilən hərtərəfli və davamlı dövlət dəstəyindən bəhrələnən ailə təsərrüfatı üzvləri kənd təsərrüfatının bütün sahələri ilə məşğul olmaqla daxili bazarın keyfiyyətli yerli ərzaq məhsulları ilə təminatına öz töhfələrini verirlər.
Vurğulanıb ki, aparılan məqsədyönlü tədbirlər nəticəsində cari ildə Culfa rayonunda ailə təsərrüfatlarının sayı 150-yə çatmaqdadır. Keçirilən festivallarda rayonda ailə təsərrüfatları tərəfindən istehsal edilən məhsullar yüksək səviyyədə nümayiş olunur.

Ardını oxu...

Muxtar respublikamızda əhalinin artan tələbatları arasında sərnişin nəqliyyatı mühüm yer tutur. Xüsusən blokada ucbatından ölkəmizin paytaxtı Bakı şəhəri ilə nəqliyyat əlaqələrinin qaydaya salınması ilə istər muxtar respublika sakinləri, istərsə də buraya səyahət edən turistlər daha çox bu nəqliyyat növündən istifadə edirlər. Mövsümi olaraq əhalinin hər iki istiqamətdə hərəkətinin artdığı dövrlərdə avtobus reyslərinin artırılması pik günlərdə sərnişin sıxlığı problemini, demək olar ki, həll edib.
Ötən günlərdə Bakı-Naxçıvan və Naxçıvan-Bakı istiqamətində hərəkət edən avtobusların xidmətlərindən xeyli sayda sərnişin istifadə edib. Bu barədə Naxçıvan Şəhər Avtovağzalından aldığımız məlumatda bildirilir ki, təkcə cari ilin avqust ayı ərzində Naxçıvandan Bakıya getmək üçün avtobus nəqliyyatından istifadə edənlərin sayı 4 min nəfərə yaxın olub. Belə ki, ayrı-ayrı günlərdə gündüz və gecə reysləri üzrə 5-6 avtobus yola çıxıb. Aldığımız məlumatda o da qeyd olunur ki, bu müddətdə əks-istiqamətdə də eyni intensivlik müşahidə edilir. Sərnişinlər arasında, xüsusən vaxt itkisinin qarşısının alınması üçün gecə saatlarında yola çıxmaq istəyənlərin sayı daha çoxdur. Naxçıvan Şəhər Avtovağzalından başqa muxtar respublikamızın Şərur, Culfa, Ordubad və Şahbuz şəhərlərindəki avtovağzallarda da bilet satışının təşkili sərnişinlərin bu nəqliyyat vasitəsindən istifadəsinə əlverişli şərait yaradıb. Bu yaxınlarda Naxçıvan Şəhər Avtovağzalında və eləcə də Bakı şəhərindəki beynəlxalq avtovağzalda gömrük nəzarəti xidmətinin təşkil olunması sərnişinlərin sərhəd-keçid məntəqələrində rahat hərəkət etmələrinə imkanlar yaradıb. Bu səbəbdən avtobuslarla yola çıxanlar arasında ortayaşlı insanlarla yanaşı, uşaqlar və yaşlıların da sayı ­artmaqdadır.
Naxçıvan Şəhər Avtovağzalında Bakıya yola düşən sərnişinlərin bəziləri ilə həmsöhbət olduğumuzda onlar təşkil olunmuş xidmətlərdən razılıqlarını dilə gətirdilər. Sərnişinlərdən Tahirə Hüseynəliyeva, Hidayət Məmmədov və digərləri rahat, təhlükəsiz və sərfəli olduğundan bu marşrutdan istifadəyə üstünlük verdiklərini bildirib insanların rahatlığı üçün yaradılmış şəraitə görə minnətdarlıq etdilər.

 Əli CABBAROV

ARXİV

Sentyabr 2019
Be Ça Ç Ca C Ş B
26 27 28 29 30 31 1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30 1 2 3 4 5 6

MÜƏLLİFLƏR

KEÇİDLƏR