07 Dekabr 2021, Çərşənbə axşamı

Naxçıvan Dövlət Universitetinin Tibb fakültəsinin həkim, rezident və tələbələrinin muxtar respublikanın ümumtəhsil məktəblərinin kollektivləri ilə “Sağlam ol!” layihəsi çərçivəsində görüşləri davam edir.
Şahbuz şəhər 1 nömrəli tam orta məktəbin müəllim və şagirdləri ilə keçirilən görüş də yaddaqalan olub. Məktəbin direktoru Şahbaz Məhərrəmov belə tədbirlərin əhəmiyyətini vuğulayaraq təşkilatçılara minnətdarlığını bildirib.

Tibb fakültəsinin dekanı Elsevər Əsədov çıxış edərək layihənin məqsədi haqqında məlumat verib. Qeyd edib ki, görüşün əhəmiyyəti tibb sahəsinə marağı olan şagirdlərin gələcəkdə bu sahədə təhsil almaq üçün onları həvəsləndirmək, eyni zamanda hər kəsin bilməli olduğu ilk tibbi yardım barədə ətraflı məlumatlar verməkdən ibarətdir. Elsevər Əsədov, eyni zamanda ali təhsil ocağının imkanları və fakültədə yaradılan müasir tədris şəraiti barədə tədbir iştirakçılarını məlumatlandırıb. Diqqətə çatdırılıb ki, müasir standartlara cavab verən və ən son texnologiyalarla təmin olunan fakültədə kabinə və laboratoriyalar, auditoriyalar var. Qeyd edilib ki, Tibb fakültəsinin məzunları bu gün həm ölkə daxilində, həm də xaricdə uğurla fəaliyyət göstərirlər.
Sonra fakültənin həkimləri məktəb kollektivinə ixtisaslar barədə məlumatlar verib və maarifləndirici söhbətlər aparıblar.
Daha sonra fakültənin müəllimləri – ginekoloq Gültəkin Əliyeva, cərrah Cəbi İsmayılov, pediatr Mətləb İbrahimov, bioloq Mürsəl Seyidov, reanimotoloq Bəxtiyar Hüseynov “İnsan anatomiyası” və Biologiya fənlərindən nümunəvi dərslər keçiblər.
Ümumi təbabət və kliniki fənlər kafedrasının baş müəllimi Bəxtiyar Hüseynov “İlk tibbi yardım” simulyasiyaları haqqında çıxış edərək həyati təhlükənin aradan qaldırılması üçün olduqca vacib olan ilkin tibbi yardımın əhəmiyyətindən danışıb. Tibb fakültəsinin tanıtım videoçarxı izlənilib. Sonra “İlk tibbi yardım” simulyasiyasının və tələbələrin çıxışlarının təqdimatı olub. Tədbirdə Suada Vahabova “Kliniki ölüm”, Həqiqət Ələsgərli “Qanaxmalar”, Şəbnəm Salmanova “Sınıqlar”, Aytac Əliyeva “Torpaq altında qalma” mövzuları ətrafında slayd və səhnəciklərlə çıxış ediblər. Qeyd edək ki, çıxışlar şagirdlər tərəfindən maraqla qarşılanıb və onlar səhnəciklərdə iştirak ediblər.
Tədbirdə, həmçinin “Sağlam gülüş” adı ilə “Dişlərin sağlamlığı və gigiyenası” və “Zərərli qidalar” mövzusunda çıxışlar dinlənilib və şagirdlərin sualları cavablandırılıb.
Sonda fakültənin həkim və rezident­lərinin iştirakı ilə ginekoloji, oftalmoloji, pediatrik, stomatoloji, kardioloji və ümumi terapevtik müayinələr həyata keçirilib.

Naxçıvan Dövlət Universitetinin
Televiziya, mətbuat və ictimaiyyətlə əlaqələr bölməsi

ARXİV

Dekabr 2021
Be Ça Ç Ca C Ş B
29 30 1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 31 1 2

MÜƏLLİFLƏR

KEÇİDLƏR